აშშ-ის პრეზიდენტმა, ჯო ბაიდენმა განაცხადა, რომ აშშ რუსეთს უპასუხებს, თუ ვლადიმერ პუტინი მასობრივი განადგურების იარაღს გამოიყენებს, თუმცა პასუხი სიტუაციაზე იქნება დამოკიდებული.

კითხვაზე, არსებობს თუ არა დაზვერვის მონაცემები, რომ პუტინი ქიმიური იარაღის გამოყენებას აპირებს უკრაინაში და რა იქნება დასავლეთის რეაქცია, აშშ-ის პრეზიდენტმა უპასუხა:

ჩვენ ვუპასუხებთ, თუ ის გამოიყენებს მას. პასუხის მასშტაბი დამოკიდებული იქნება ამ იარაღის გამოყენების ფორმაზე.

მანამდე ნატოს გენერალურმა მდივანმა, იენს სტოლტენბერგმა განაცხადა, რომ რუსეთი უკრაინაში ქიმიური იარაღის გამოყენების საბაბის შექმნას შეიძლება ცდილობდეს.

„ჩვენ ნაწილობრივ იმიტომ ვართ შეშფოთებულნი, რომ ვხედავთ რიტორიკას და ვხედავთ, რომ რუსეთი ცდილობს შექმნას რაიმე სახის საბაბი და დაადანაშაულოს უკრაინა, შეერთებული შტატები და ნატოს მოკავშირეები ქიმიური და ბიოლოგიური იარაღის გამოსაყენებლად მომზადებაში. ასევე არსებობს რისკი, რომ ქიმიური იარაღით შეტევას პირდაპირი გავლენა ექნება ნატოს ქვეყნებში მცხოვრებ ადამიანებზე, რადგან ჩვენ ვხედავთ დაბინძურებას, ჩვენ ვხედავთ ქიმიური აგენტების ან ბიოლოგიური იარაღის გავრცელებას ჩვენს ქვეყნებში“, - აღნიშნა ნატოს გენერალურმა მდივანმა.