რუსეთის პრეზიდენტმა ვლადიმირ პუტინმა პრეზიდენტის სპეციალური წარმომადგენლის ანატოლი ჩუბაისის თანამდებობიდან გათავისუფლების შესახებ განკარგულებას ხელი მოაწერა. ინფორმაციას რუსული მედია ავრცელებს.

„განკარგულებას ანატოლი ჩუბაისის თანამდებობიდან გათავისუფლების შესახებ პრეზიდენტმა უკვე ხელი მოაწერა“, - განაცხადა კრემლის ლიდერის პრესმდივანმა დიმიტრი პესკოვმა.

შეგახსენებთ, ჩუბაისი პრეზიდენტის სპეციალურ წარმომადგენლად 2020 წლის 4 დეკემბერს დაინიშნა. მანამდე ის 12 წლის განმავლობაში ხელმძღვანელობდა „როსნანოს“, სადაც ჯერ იყო გენერალური დირექტორი, შემდეგ კი სახელმწიფო კორპორაციის გამგეობის თავმჯდომარე. ის ასევე ხელმძღვანელობდა სახელმწიფო კორპორაციები Rosnanotech-სა და რუსეთის ერთიან ენერგეტიკულ სისტემას.

1990-იან წლებში ჩუბაისი იკავებდა მაღალ თანამდებობებს მთავრობაში, მათ შორის იყო პირველი ვიცე-პრემიერი და ასევე რამდენიმე თვის განმავლობაში ხელმძღვანელობდა პრეზიდენტ ბორის ელცინის ადმინისტრაციას.