„შესაძლოა, ვიღაცის ინტერესში შედის, ისევ დავერიოთ ერთმანეთს ქართველები, აფხაზები და ოსები. ეს არის ქართული სახელმწიფოს განადგურების მცდელობა. მე ამას ასე აღვიქვამ“, - ამის შესახებ პოეტმა დავით მაღრაძემ გადაცემაში „იმედი LIVE“ განაცხადა.

„საქართველოს მოსახლეობას აფხაზებთან და ოსებთან ომი არ უნდა. ეს მაშინაც რუსეთის მიერ პროვოცირებული ომი იყო. ისტორიულად, ჩვენ ამდენი საუკუნე ერთად მოვედით. ამ ერთი კულტურული სივრცის წიაღში ვცხოვრობდით, შერეული ქორწინებებით და აქ საფუძველი არ იყო იმისა, რომ ასეთი ბზარები გაჩენილიყო და რომ ასეთ სისხლისმღვრელ ბრძოლებში გადაიზრდებოდა. სამწუხაროდ, ეს მოხდა. ახლა იმის ნაცვლად, რომ ამ ურთიერთობების აღდგენაზე გვქონდეს მთელი ყურადღება მობილიზებული ხელისუფლებასაც და საზოგადოებასაც, როგორ აღვადგინოთ ჩვენი საუკუნეობრივი, კულტურული ურთიერთთანაცხოვრება ერთ სახელმწიფოში ჩვენ, აფხაზებმაც და ოსებმაც, ამის ნაცვლად, შესაძლოა, ვიღაცის ინტერესში შედის, ისევ დავერიოთ ერთმანეთს ქართველები, აფხაზები და ოსები, ეს არის ქართული სახელმწიფოს განადგურების მცდელობა. მე ამას ასე აღვიქვამ. ჩვენ უნდა ავაშენოთ ისეთი ქართული სახელმწიფო, სადაც ქართველებთან ერთად თავისუფლად, კეთილგანწყობით და თანაცხოვრების მაღალი კულტურით იცხოვრებენ აფხაზები, ოსები და სხვა ერის წარმომადგენლები“, - განაცხადა დავით მაღრაძემ.

მისი თქმით, ხელისუფლებას ვერ უკარნახებს, თუ როგორი პოლიტკორექტულობა უნდა გამოიჩინოს.

„არ მაქვს ამის რეცეპტი. მე შემიძლია, ვთქვა, რომ ჩემი აზრით, საქართველოში მოსახლეობა მეორე ფრონტს მხარს არ უჭერს. ერთადერთი იმუშავებს საქართველოში ფრაზა „არა ომს!“, რომლის გარშემოც შესაძლებელია, მოხდეს მოსახლეობის სრული მობილიზაცია და ეს ასეც იქნება, თუ საჭირო გახდა“, - განაცხადა მაღრაძემ.