აშშ-ის სახელმწიფო მდივანმა, ენტონი ბლინკენმა განაცხადა, რომ აშშ-მა კიევში თავისი საელჩო ხელახლა გახსნა მას შემდეგ, რაც ის სამი თვის წინ, უკრაინაში რუსეთის შეჭრამდე დაიხურა.

„დღეს ჩვენ ოფიციალურად ვანახლებთ მუშაობას კიევში აშშ-ის საელჩოში. უკრაინელმა ხალხმა, უსაფრთხოების სფეროში ჩვენი დახმარებით, დაიცვა თავისი სამშობლო რუსეთის შეჭრის ფონზე და, შედეგად, საელჩოს თავზე აშშ-ის დროშა ფრიალებს. ჩვენ ვაგრძელებთ უკრაინის მთავრობისა და ხალხის მხარდაჭერას მაშინ, როდესაც ისინი იცავენ თავიანთ ქვეყანას კრემლის სასტიკი აგრესიული ომისგან“, - აღნიშნა ენტონი ბლინკენმა.