საქართველოს პარლამენტის თავმჯდომარე შალვა პაპუაშვილი, დეპუტატებთან ერთად, ბოლნისის მუნიციპალიტეტის სოფელ ნახიდურის საჯარო სკოლას ეწვია.

პარლამენტის თავმჯდომარე და დეპუტატები ნახიდურის სკოლის მეოთხე კლასის ქართული ენის გაკვეთილს დაესწრნენ.

ნახიდურის სკოლაში პარლამენტის თავმჯდომარემ და დეპუტატებმა ბოლნისის მუნიციპალიტეტის  სხვადასხვა სკოლის დირექტორებთან, მასწავლებლებთან და ადგილობრივი რესურსცენტრის წარმომადგენლებთან  შეხვედრა გამართეს, სადად სახელმწიფო  ენის  ფლობის მნიშვნელობაზე ისაუბრეს.

შალვა პაპუაშვილმა საქართველოში მცხოვრები ეთნიკური უმცირესობებისთვის ხარისხიანი განათლების ხელმისაწვდომობის უზრუნველყოფის კუთხით პარლამენტის როლზე და სამომავლო გეგმებზე  გაამახვილა ყურადღება.

შეხვედრის მონაწილეებს მიმართეს პარლამენტის განათლებისა და მეცნიერების კომიტეტის თავმჯდომარე გიორგი ამილახვარმა, რეგიონული პოლიტიკისა და თვითმმართველობის კომიტეტის თავმჯდომარე სოზარ სუბარმა, ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე მიხეილ სარჯველაძემ, ბოლნისის, დმანისის, თეთრიწყაროსა და წალკის მაჟორიტარმა დეპუტატმა გოგი მეშველიანმა და განათლებისა და მეცნიერების კომიტეტის წევრმა ხათუნა კვიციანმა. დეპუტატებმა ასევე მასწავლებლების  შეკითხვებსაც უპასუხეს.

„პარლამენტის თავმჯდომარესთან ერთად ვესტუმრეთ ნახიდურის საჯარო სკოლას. განათლების და მეცნიერების კომიტეტს დაწყებული აქვს თემატური მოკვლევა ეთნიკური უმცირესობებისთვის ხარისხიან განათლებაზე ხელმისაწვდომობის შესახებ. ამიტომ, ჩვენთვის მნიშვნელოვანია, ადგილზე გავეცნოთ, თუ როგორ მიმდინარეობს სწავლების პროცესი, მათ შორის, ქართული ენის სწავლების პროცესი. დავესწარით ქართული ენის გაკვეთილს, ასევე, შევხვდით მასწავლებლებს, სკოლის ხელმძღვანელობას და ვიმსჯელეთ ყველა იმ გამოწვევაზე, რაც ამ სკოლას  და ასევე, მთლიანად, ჩვენს ეთნიკურ უმცირესობებს აქვს, რათა ხარისხიანი განათლებაზე ხელმისაწვდომობა სახელმწიფოს მხრიდან იყოს სრულად უზრუნველყოფილი“, - განაცხადა გიორგი ამილახვარმა.