„გუშინდელ დღემდე, ვიდრე განცხადება არ გაკეთდა ჩემი მხრიდან, თქვენ ამტკიცებდით, რომ ნიკა გვარამიამ გამოიყენა სამსახურის ავტომანქანა და ამისთვის დააკავეს, იყო ერთკვირიანი ძალიან ცუდი ფეიკი, ახლა გადააკეთეთ“, - ამის შესახებ „ქართული ოცნების“ აღმასრულებელმა მდივანმა მამუკა მდინარაძემ ნიკა გვარამიასთან დაკავშირებით „მთავარი არხის“ მიერ დასმული კითხვის პასუხად განაცხადა.

როგორც მამუკა მდინარაძემ აღნიშნა, „რუსთავი 2“-ის ბალანსზე 67 000 ევრო უნდა შესულიყო. ე.ი. ამდენით დაზარალდა „რუსთავი 2“ და ზიანისათვის რატომ არ უნდა იყოს გამოყენებული პატიმრობა, როდესაც 10 000 ლარზე არის დაკავებული უამრავი ადამიანი?

„ჩვენ არავინ დაგვიჭერია, ის სასამართლომ დაიჭირა. აქ მნიშვნელობა აქვს დამნაშავეა თუ არა, თუ დამნაშავეა, რატომ არ უნდა დააკავონ, რატომ არ უნდა დასაჯონ ადამიანი, რომელიც დამნაშავეა? უდანაშაულობას არგუმენტი არ უნდა? კერძო კომპანიის კი, არა გუშინდლამდე ამბობდით და მთელი ნარატივი დაალაგეთ, რომ ნიკა გვარამიამ გამოიყენა სამსახურის მანქანა და ამისთვის დააკავეს. ახლა რატომ იყო ტყუილი - „რუსთავი 2“-ის ეს ავტომანქანა არასდროს ყოფილა. ნიკა გვარამია, როგორც გაირკვა, რა ავტომობილითაც დადიოდა, რითაც ზიანი მიაყენა და არა მხოლოდ ამით, ბინებით, თანხით და ა.შ. ეს ერთ-ერთია, თქვენ ამოარჩიეთ პიარისთვის, მაგრამ ამაშიც ჩაგყვებით, აქ არის ლაპარაკი, რომ „რუსთავი 2“-ის ეს ავტომანქანა არასდროს ყოფილა. ეს არის ფეიკის მხილება და მეორე - რაც შეეხება კერძო კომპანიას, ნიკა გვარამიამ რომ კერძო კომპანიაზე გააფორმა ბინა თუ ავტომანქანა, რომელიც „რუსთავის 2“-ში უნდა შესულიყო, ან რომლის საფასურიც „რუსთავი 2“-ში უნდა შესულიყო და ამ თანხით დააზარალა „რუსთავი 2“, ეს დანაშაულს რატომ გამორიცხავს? თქვენ რომ პასუხს ვერ მცემთ, ეს არის უარგუმენტობა. 6 მილიონ 700 ათასზეა საუბარი. 67 000 ევრო უნდა შესულიყო „რუსთავი 2“-ის ბალანსზე, ის ავტომანქანა, რომელიც ნიკა გვარამიას მეგობრის კომპანიაზე გაფორმდა. ე.ი. ამდენით დაზარალდა „რუსთავი-2“ და ზიანისათვის რატომ არ უნდა იყოს გამოყენებული პატიმრობა, როდესაც 10 000 ლარზე არის დაკავებული უამრავი ადამიანი“, - განაცხადა მამუკა მდინარაძემ.