თავდაცვის ყოფილი მინისტრი თინა ხიდაშელი „ფეისბუქ"-მომხარებლის გიორგი ზერეკიძის განცხადებას ეხმაურება, სადაც ის დეპუტატ ლევან ბერძენიშვილს მიმართავს.

„გიორგი მართალ! გოგიჩა ისე მიყვარს, მთლად შენსავით არა, მაგრამ ძალიან!", - წერს ხიდაშელი.

შეგახსენებთ, რომ „ფეისბუქ"-მომხმარებელი გიორგი ზერეკიძე ლევან ბერძენიშვილს პასუხობს და აცხადებს, რომ „ღირსეული გამარჯვება ოპონენტთან ჯანსაღ კონკურენტულ გარემოში ბრძოლით მიიღწევა და არა იაფასიანი პოლიტიკური განცხადებების საფუძველზე".

„ფეისბუქ"-მომხმარებელი ზერეკიძე ბერძენიშვილს 4 წლის წინ მიღებულ დადგენილებას ახსენებს, რომლიც პარლამენტმა უკანონო და პოლიტიკური ნიშნით დაკავებული პირების შესახებ მიიღო.

გიორგი ზერეკიძე აცხადებს, რომ ლევან ბერძენიშვილის მიერ გაკეთებული დისკრიმინაციული განცხადებები 4 წლის წინ მიღებულ დაგდენილებას ეწინააღმდეგება.

„2012 წელს, როდესაც საქართველოს პარლამენტმა მიიღო დადგენილება უკანონო თუ პოლიტიკური ნიშნით დაკავებული პირების შესახებ თქვენ და თქვენმა გუნდმა მხარი დაუჭირეთ ამ კანონპროექტს, რაც ძალიან ლოგიკური იყო. დღევანდელი თვენი ეს დისკრიმინაციული განცხადება ეწინააღმდეგება სულ რაღაც 4 წლის წინ მიღებულ გადაწყვეტილებას ბატონო ლევან. ცხადია ამას იმიტომ აკეთებთ რომ ლევან გოგიჩაიშვილი თქვენი ოპონენტია, მაგრამ აქვე მინდა ვთქვა, ღირსეული გამარჯვება ოპონენტთან ჯანსაღ კონკურენტულ გარემოში ბრძოლით მიიღწევა და არა იაფასიანი პოლიტიკური განცხადებების საფუძველზე. მეც მონსტრად მოგეჩვენებით ალბათ, ძალიან მწყინს ამას რომ ვამბობ", - წერს ზერეკიძე.

ცნობისთვის, საბურთალოს ოლქში, „ქართული ოცნების" მაჟორიტარობის კანდიდატს ლევან გოგიჩაიშვილს „რესპუბლიკელი" დავით უსუფაშვილი დაუპირისპირდება.

„დავით უსუფაშვილს დაუყენეს ლევან გოგიჩაიშვილი - რადგან ბანდიტი იყო და ციხეში ნაჯდომია, კარგი ვაჟკაცი იქნება? ვერ გავიგე, რა მიდგომაა პარლამენტის თავმჯდომარის მიმართ", - განაცხადა ლევან ბერძენიშვილმა.