„არახამია უსირცხვილო, სამარცხვინო კაცია და შუბლის ძარღვი არ აქვს“, - ასე შეაფასა „ქართული ოცნების“ თავმჯდომარემ ირაკლი კობახიძემ  „პალიტრანიუსის“ ეთერში ფრაქცია „ხალხის მსახურის“ თავმჯდომარის, დავით არახამიას განცხადება, რომლის თანახმად საქართველოს ხელისუფლება რუსეთს სანქციებისთვის გვერდის ავლაში ეხმარება.

როგორც ირაკლი კობახიძემ აღნიშნა, დავით არახამიას ადგილზე რომ იყოს, „ერთი ღამითაც არ დაეძინებოდა“.

„არახამია ვინ არის, ყველამ კარგად იცის, სააკაშვილმა თვითონ აღნიშნა, რომ მისი „დაფრთიანებულია“, მერე „Free Misha“-ს მაისურით გამოდიოდა თვითონ. ვინც არის, ყველამ ძალიან კარგად იცის. გარდა ამისა, მგონი, საზოგადოებაც აფასებს, რომ ეს არის ჩვეულებრივი სამარცხვინო კაცი. დღეში ასეულობით ადამიანი ეღუპებათ უკრაინაში, უმძიმესი ვითარებაა და ამ დროს მას სცხელა, რომ ასეთ რაღაცებზე ილაპარაკოს. მის ადგილას ერთი ღამით არ მეძინებოდა, მაგრამ სინდისი რომ არ გაქვს და შუბლის ძარღვი, არახამია რომ ხარ, რა თქმა უნდა, ასეთი რაღაცებისთვის მოიცლი. ეს არის ჩვეულებრივი სამარცხვინო კაცი, რა უნდა ვილაპარაკო მასზე, არ ვიცი“, - განაცხადა კობახიძემ.

მისი თქმით, დავით არახამია მიზანმიმართულად ავრცელებს ტყუილებს.

„ის არის იმ სცენარის თანამონაწილე, რომელიც ბაკურიანში „მოიხარშა“. სამარცხვინო კაცია, თავის თავს მიხედოს“, - განაცხადა კობახიძემ.