პუბლიცისტი ვასილ მაღლაფერიძე ცნობილი მეცნიერის, ბაჩანა ბრეგვაძის მთაწმინდის პანთეონში დაკრძალვას მიესალმება:

„ბატონი ბაჩანას მთაწმინდისთვის მიბარება მართალი გადაწყვეტილებაა და ეს იმდენად ბატონ ბაჩანას არ სჭირდება, რამდენადაც - ჩვენ, რომ ვისწავლოთ გონიერების, ღირსების და ნიჭიერების დაფასება.

ძვირფასი უბრალოება!"- აღნიშნავს მაღლაფერიძე.

სახელმწიფო დამკრძალავი კომისიის გადაწყვეტილებით, ცნობილი ქართველი მეცნიერი, მთარგმნელი და მწერალი ბაჩანა ბრეგვაძე ქართველ მწერალთა და საზოგადო მოღვაწეთა მთაწმინდის პანთეონში დაიკრძალება. ამავე კომისიის რეკომენდაციით, თბილისის ერთ-ერთ ქუჩას სწორედ  ბაჩანა ბრეგვაძის სახელი მიენიჭება.

სახელმწიფო დამკრძალავი კომისია პრემიერ-მინისტრის დავალებით შეიქმნა და სხვადასხვა უწყების წარმომადგენლით დაკომპლექტდა.

ქართველი მეცნიერის, მთარგმნელისა და მწერლის, ბაჩანა ბრეგვაძის დაკრძალვასთან დაკავშირებულ ყველა ხარჯს მთლიანად სახელმწიფო დაფარავს.