ირანმა სანქციები დაუწესა დამატებით 61 ამერიკელს, მათ შორის ყოფილ სახელმწიფო მდივანს მაიკ პომპეოს ირანელი დისიდენტების მხარდაჭერისთვის. ამის შესახებ ინფორმაციას სააგენტო „როიტერი“ ავრცელებს.

„შავ სიაში“ შეყვანილ სხვა პირებს შორის არიან ასევე აშშ-ის ყოფილი პრეზიდენტის დონალდ ტრამპის პირადი ადვოკატი რუდი ჯულიანი, ეროვნული უსაფრთხოების საკითხებში თეთრი სახლის ყოფილი მრჩეველი ჯონ ბოლტონი.

აშშ-ის მოქალაქეების წინააღმდეგ სანქციები ოფიციალურმა თეირანმა გამოაცხადა მაშინ, როდესაც აშშ-ის პრეზიდენტი ჯო ბაიდენი ახლო აღმოსავლეთში ვიზიტს ასრულებს. როგორც სააგენტო „როიტერი“ წერს, ირანის ეს ნაბიჯი დიდწილად სიმბოლური მნიშვნელობისაა, რადგან „შავ სიაში“ შეყვანილი პირები დიდი ალბათობით ირანში აქტივებს არ ფლობენ, რის გაყინვასაც დაწესებული სანქციები ითვალისწინებს.

ირანის ხელისუფლებამ 51 ამერიკელს სანქციები მიმდინარე წლის იანვარში დაუწესა, ხოლო კიდევ 21-ს, აპრილში.

ამჟამად მიმდინარეობს ირანსა და აშშ-ის შორის 2015 წლის ბირთვული შეთანხმების აღდგენის საკითხზე არაპირდაპირი მოლაპარაკებები, რომლებიც ვენაში ნოემბერში დაიწყო და ყატარში ივნისში გაგრძელდა. სააგენტო „როიტერი“ წერს, რომ მოლაპარაკებები ჩიხშია შესული.

2018 წელს აშშ-ის მაშინდელმა პრეზიდენტმა დონალდ ტრამპმა ირანთან ბირთვული შეთანხმება გააუქმა და თეირანის წინააღმდეგ აშშ-ის სანქციები აღადგინა. საპასუხოდ ირანმა შეთანხმებით გათვალისწინებული ბირთვული პროგრამის შეზღუდვები დაარღვია.