„წლის დასაწყისში რუსეთმა გაგზავნა თავისი ჯარები ყაზახეთში საპროტესტო აქციების ჩასახშობად. ამ მოვლენებიდან ექვსი კვირის შემდეგ, როდესაც რუსული ჯარები უკრაინაში შეიჭრნენ, ცენტრალური აზიის სახელმწიფომ ომში ნეიტრალიტეტი გამოაცხადა, თავდაცვის ბიუჯეტი გაზარდა და დაიწყო მოკავშირეების ძებნა შეერთებულ შტატებში, თურქეთსა და ჩინეთში“, - ამის შესახებ The Wall Street Journal წერს.

ყაზახეთის პოზიციის ჩამოყალიბებაში მნიშვნელოვანი მომენტი დადგა ივნისში, როდესაც ქვეყნის პრეზიდენტმა ტოკაევმა, პუტინის თანდასწრებით, უკრაინის მთლიანობას მხარი დაუჭირა და ე.წ. დონეცკისა და ლუგანსკის სახალხო რესპუბლიკების დამოუკიდებლობის აღიარებაზე უარი თქვა.

გარდა ამისა, მან ასევე განაცხადა, რომ ყაზახეთი რუსეთს სანქციების გვერდის ავლაში არ დაეხმარება.

გამოცემის სტატიაში აღნიშნულია, რომ ყაზახეთმა უკრაინის მაგალითიდან გაკვეთილი მიიღო და გადაწყვიტა, რომ თავდაცვის ბიუჯეტის დაახლოებით 918 მილიონი დოლარით გაზარდოს.

ყაზახეთის ანონიმურმა მაღალჩინოსანმა WSJ-ს განუცხადა, რომ თანხების ნაწილი ქვეყნის სამხედრო რეზერვების გაზრდას მოხმარდება.