თეთრი წყაროს მუნიციპალიტეტში, სოფელ კოდასთან დღეს ორი ავტოსაგზაო შემთხვევა მოხდა.

ავტოსაგზაო შემთხვევის შედეგად არიან დაშავებულები და ასევე არის მსხვერპლი.

უზენაესი სასამართლოს ინფორმაციით, ავტოსაგზაო შემთხვევის შედეგად გარდაიცვალა ბოლნისის სასამართლოს მოსამართლე ლევან ბარდაველიძე.

„საქართველოს უზენაესი სასამართლო ღრმა მწუხარებას გამოთქვამს დღეს მომხდარი უბედური შემთხვევის შედეგად ბოლნისის რაიონული სასამართლოს მოსამართლის, ლევან ბარდაველიძის მოულოდნელი გარდაცვალების გამო და გულწრფელ სამძიმარს უცხადებს ბატონი ლევანის ოჯახს, მის ახლობლებსა და კოლეგებს.

ბატონი ლევანი გახლდათ სამაგალითო კოლეგა, იგი მრავალი წლის მანძილზე ღირსეულად და მაღალი პროფესიონალიზმით ასრულებდა სამოსამართლო საქმიანობას. მისი მოულოდნელი გარდაცვალება დიდი დანაკარგია მთლიანი სასამართლო სისტემისთვის“, - აღნიშნულია ინფორმაციაში.

მომხდარზე გამოძიება სისხლის სამართლის კოდექსის 276-ე მუხლით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს. ისჯება ჯარიმით ან თავისუფლების აღკვეთით ვადით ერთ წლამდე.