ვიცე-პრემიერმა კახი კალაძემ დმანისში, „ქართული ოცნების" მაჟორიტარობის კანდიდატის კახა ოქრიაშვილის წარდგენაზე შეკრებილ მოქალაქეებს მიმართა.

„მინდა, ძალიან დიდი მადლობა მოგახსენოთ თითოეულ თქვენგანს. მადლობა პარტიის თავმჯდომარეს, თითოეულ წევრს, თითოეულ ჯარისკაცს, ვინც მზად არის, ემსახუროს ჩვენს ქვეყანას, სამშობლოს, ჩვენს ხალხს. დარწმუნებული ვარ, იმ გზას, რომელიც ჩვენ 2012 წელს თქვენთან ერთად, სრულიად ჩვენი ქვეყნის მოსახლეობასთან ერთად დავიწყეთ, ღირსეულად გავივლით",-აღნიშნა კალაძემ.

ვიცე- პრემიერის თქმით, ამ ოთხი წლის განმავლობაში იყო სიძნელეები, თუმცა, ეს ბარიერები გადალახულია.

„დარწმუნებული ვარ, მომავალშიც ღირსეულად გავართმევთ ამ საპასუხისმგებლო საქმიანობას თავს, ისევ და ისევ ჩვენი ქვეყნის, ჩვენი სახლის საკეთილდღეოდ. უარავი პროექტი, უამრავი პროგრამა იქნა განხორციელებული, თუმცა პრობლემები, ჯერ კიდევ რჩება ქვეყანაში.

 ჩვენი ერთსულოვნებით, ერთად დგომით ამ პრობლემებს აუცილებლად მოვაგვარებთ. ზუსტად პარტია „ქართული ოცნება" გახლავთ საქართველოში ერთადერთი რეალური პოლიტიკური ძალა, ვისაც აქვს რეალური შესაძლებლობა, ეს პრობლემები იყოს ეტაპობრივად მოგვარებული და, რა თქმა უნდა, თქვენთან ერთად. მინდა, კახა ოქრიაშვილს ვუსურვო წარმატებები.

დარწმუნებული ვარ, ჩვენი გამარჯვება იქნება არა მხოლოდ პარტია „ქართული ოცნების" მხარდამჭერების გამარჯვება, ჩვენი აქტივისტების გამარჯვება, ეს იქნება სრულიად სააქართველოს გამარჯვება, რადგან პარტია „ქართული ოცნების" გამარჯვება პირდაპირ კავშირშია ჩვენი ქვეყნის მოსახლეობის კლეთილდღეობასთან",-აღნიშნა კახა კალაძემ.