პარლამენტის საფინანსო-საბიუჯეტო კომიტეტის თავმჯდომარემ, ირაკლი კოვზანაძემ და ევროპასთან ინტეგრაციის კომიტეტის თავმჯდომარემ,  მაკა ბოჭორიშვილმა  ერთიანი ევრო გადახდის სივრცეში (SEPA-ში) საქართველოს გაწევრიანების საკითხზე ეროვნული ბანკის და ეკონომიკისა და მდგრადი განვითარების სამინისტროს წარმომადგენლებთან სამუშაო შეხვედრა გამართეს.

„ერთიანი ევრო გადახდის სივრცეში (SEPA-ში) საქართველოს გაწევრიანება მნიშვნელოვანი და წინ გადადგმული ნაბიჯი იქნება ქვეყნის საფინანსო სექტორისთვის", - განაცხადა საფინანსო-საბიუჯეტო კომიტეტის თავმჯდომარემ, ირაკლი კოვზანაძემ. მისი თქმით, ევროზონაში საბანკო გადარიცხვები გამარტივდება და გაიაფდება, რაც სასარგებლოა, როგორც ბიზნესისთვის ასევე მოქალაქეებისთვის.

ევროპასთან ინტეგრაციის კომიტეტის თავმჯდომარის,  მაკა ბოჭორიშვილის განცხადებით, სასურველია, საქართველომ  SEPA-ში   გასაწევრიანებლად განაცხადისთვის მოსამზადებელი სამუშაოები დროულად დაასრულოს და მომზადდეს ის საკანონმდებლო ცვლილებები, რაც SEPA-ს კრიტერიუმების დასაკმაყოფილებლად არის საჭირო.

შეხვედრაზე ისაუბრეს SEPA-ს გეოგრაფიულ სივრცეში გაწევრიანებისთვის  აუცილებელ საკანონმდებლო ინიციატივების მომზადებაზე. კომიტეტის თავმჯდომარეებმა გამოთქვეს მზადყოფნა, მხარი დაუჭირონ ამ მიმართულებით საქართველოს პარლამენტში საკანონმდებლო პროცესის დროულ წარმართვას.

შეხვედრას ესწრებოდნენ: ეროვნული ბანკის ვიცე-პრეზიდენტები: არჩილ მესტვირიშვილი და პაპუნა ლეჟავა, ასევე  ეკონომიკისა და მდგრადი განვითარების სამინისტროს კაპიტალის ბაზრის განვითარებისა და საპენსიო რეფორმების დეპარტამენტის უფროსი, გიორგი გურგენიძე.