„ძალიან ძნელია ელაპარაკო ჟურნალისტს ფილმზე „ჯარისკაცის მამა“, რომელიც „ზემოდან“ კარნახის გარეშე რამდენიმე წუთის განმავლობაში ვერ სცემდა პასუხს ირაკლი კობახიძის შეკითხვას - ეზიზღება თუ არა მას პირადად რიგითი რუსი და როცა უკარნახეს, თქვა არა, არ მეზიზღებაო“, - ასე გამოეხმაურა ექსპერტი გია გაბრიჭიძე „ქართული ოცნების“ თავმჯდომარის ირაკლი კობახიძის ბრიფინგს, სადაც მან აღნიშნა, რომ საქართველოში შემოსული რუსეთის მოქალაქეები ქვეყნის უსაფრთხოებისთვის საფრთხეს არ ქმნის. მან პარტიაში გამართულ ბრიფინგზე „ნაციონალურ მოძრაობას“ „ომისა და ღალატის პარტია“ უწოდა და თქვა, რომ ისინი რუსეთის მოქალაქეების წინააღმდეგ „სამარცხვინო, ქსენოფობიურ და შოვინისტურ კამპანიას ეწევიან“.

მისი თქმით, ეს იყო პრევენცია, რომ სახელმწიფო მაქსიმალურად აკონტროლებს სიტუაციას და ნებისმიერი პროვოკაცია აღკვეთილი იქნება.

„შეუძლებელია, აუხსნა უსამშობლო, უჯიშო, ურწმუნო ადამიანს, რომელიც რობოტის მსგავსად მიჰყვება ჩადებულ პროგრამას, აუხსნა თუ რას ნიშნავს ქსენოფობია, ადამიანობა, ბიზნესი რომლის მიერ მოტანილი შემოსავალი უამრავ ოჯახს მთელი წელიწადი გამოკვებავს. სისულელეა ელაპარაკო პატრიოტიზმზე და იწვალო იმის ასახსნელად, რომ ქალისთვის ქვის სროლა, რესტორანში „სავიზო რეჟიმის“ დაწესება და მსგავსი გამოხტომა მინიმუმ სისულელეა და მაქსიმუმ პროვოკაცია. არ ღირს იმ ციფრების მოყვანა, თუ რა მდგომარეობა იყო ადრე და რა არის ახლა. ძალიან ძნელია ელაპარაკო ჟურნალისტს ფილმზე „ჯარისკაცის მამა“, რომელიც „ზემოდან“ კარნახის გარეშე რამდენიმე წუთის განმავლობაში ვერ სცემდა პასუხს ირაკლი კობახიძის შეკითხვას - ეზიზღება თუ არა მას პირადად რიგითი რუსი და როცა უკარნახეს, თქვა არა, არ მეზიზღებაო. აქ მთავარი ერთი რამაა - ამ ომისა და ღალატის პარტიისაგან და მისი სატელიტებისგან, ამ ვითომდა უფლებადამცველი არასამთავრობოების მხრიდან ყველაფერია მოსალოდნელი. მათ ხელში აქვთ ტელევიზიები, ანუ პროპაგანდის მანქანები, რომლებსაც მტრობისთვის, ბოროტების დათესვისთვის იყენებენ და ჰყავთ ადამიანები, რომლებიც ყველაფერზე მოაწერენ ხელს. კობახიძის ბრიფინგი იყო პრევენცია. გაფრთხილება, რომ სახელმწიფო მაქსიმალურად აკონტროლებს სიტუაციას და ნებისმიერი პროვოკაცია აღკვეთილი იქნება“, - წერს გია გაბრიჭიძე ფეისბუქზე.