საქართველოს პრემიერ-მინისტრმა გიორგი კვირიკაშვილმა დღეს წალკაში „ქართული ოცნების" მაჟორიტარობის კანდიდატი კახა ოქრიაშვილი წარადგინა.

ოქრიაშვილმა წალკის მოსახლეობას სიტყვით მიმართა და აღნიშნა, რომ საქართველომ ბევრი სირთულე გადაიტანა და დასძინა, რომ საქართველოს ყოველთვის ჰქონდა კვალიფიციური და გაწონასწორებული პოლიტიკოსების დეფიციტი.

„წალკა, როგორც დმანისი, მრავალეთნიკურია. აქ საქართველოს სხვადასხვა კუთხის ქართველები ცხოვრობენ. ქართველებთან ერთად ცხოვრობენ სომხები, ბერძნები, აზერბაიჯანელები, რუსები. ჩვენ ერთი დიდი ოჯახი ვართ. ჩვენ ერთმანეთთან ურთიერთობა ვიცით და ამ დამოკიდებულებას ძალიან ვაფასებთ, ვუფრთხილდებით. წარსულში საქართველო  დიდი პრობლემების მომსწრეა. ვნახეთ სამოქალაქო დაპირისპირება, ქვეყნის ნგრევა, ეკონომიკის ჩამოშლა, იყო ბევრი წარმატებაც. რატომ ხდებოდა ეს რყევები ჩვენს ქვეყანაში წარსულში? ჩვენს მიერ არჩეული მთავრობები, სამწუხაროდ ბევრ შეცდომას უშვებდნენ. ჩვენს ქვეყანას ყოველთვის ჰქონდა კვალიფიციური, მდგრადი, გაწონასწორებული პოლიტიკოსების დეფიციტი", - განაცხადა კახა ოქრიაშვილმა.

მაჟორიტარობის კანდიდატის თქმით, „ქართული ოცნების" ახალი გუნდი წინ წაიყვანს ქვეყანასა და თითოეულ საქართველოს მოქალაქეს.

„დღეს ჩვენ ყველას გვაქვს შანსი, ბატონი გიორგი კვირიკაშვილის ირგვლივ, შევქმნათ კვალიფიციური ხალხისგან შემდგარი „ქართული ოცნების" სრულიად ახალი გუნდი, რომელიც წინ წაიყვანს ქვეყანას და თითოეულ ჩვენს მოქალაქეს. მე გამაჩნია წლების განმავლობაში ბიზნესსა და პოლიტიკაში დაგროვილი გამოცდილება, ცოდნა. მინდა, რომ ეს გამოცდილება მოვახმარო ჩვენს ქვეყანას, მათ შორის წალკას და დმანისს, მოვახმარო ამ ახალ კვალიფიციურ გუნდთან ერთად. დღეს ჩვენ ვართ ის ძალა, ვისაც ძალუძს  ქვეყანა, ხალხი წინ წაიყვანოს. ჩვენ გვაქვს ოთხ პუნქტიანი კონკრეტული გეგმა ჩვენი ქვეყნის განვითარების. მოდით, დავდგეთ ერთმანეთის გვერდით, ერთობლივად შევქმნათ ჩვენი შვილების მომავალი საქართველო. ძვირფასო წალკელებო, თქვენ და ჩვენ ერთად გავიმარჯვებთ", - განაცხადა კახა ოქრიაშვილმა.