გავრცელებული ვიდეოჩანაწერების ფონზე, რომელსაც ფინეთში სკანდალი მოჰყვა, პოლონეთის პრემიერ-მინისტრმა, მატეუშ მორავეცკიმ მხარი დაუჭირა მის ფინელ კოლეგას, სანა მარინს და განაცხადა, რომ ფინეთის პრემიერს ზეიმის კარგი მიზეზი ჰქონდა, რადგან მისი ქვეყანა NATO-ში წევრიანდება.

„პრემიერ-მინისტრს ბედნიერების მიზეზი აქვს, რადგან ფინეთი NATO-ში შევიდა. თუ ამის გამო ფინეთის პრემიერ-მინისტრმა ცოტა მეტი Finlandia (არაყი) დალია და იცეკვა, ამაში არაფერია საშინელი“, - აღნიშნა მატეუშ მორავეცკიმ.

ფინეთის პრემიერ-მინისტრმა, სანა მარინმა განაცხადა, რომ ნარკოტესტი გაიარა მას შემდეგ, რაც მიმდინარე კვირაში ვიდეო გამოქვეყნდა, რომელშიც ის კერძო სახლში გამართულ წვეულებაზე ცეკვავს.

აღსანიშნავია, რომ გავრცელებულ ვიდეოში ისმის საუბარი, სადაც სავარაუდოდ ნახსენებია კოკაინი.

„ბოლო დღეებში საკმაოდ მძიმე საჯარო ბრალდებები გავრცელდა, რომ მე ვიყავი ისეთ სივრცეში, სადაც ნარკოტიკებს იყენებდნენ, ან მე თვითონ ვიყენებდი ნარკოტიკებს. მიმაჩნია ეს ბრალდებები ძალზე სერიოზულად და, მართალია, ნარკოტესტის მოთხოვნა უსამართლოდ მიმაჩნია, ჩემი სამართლებრივი დაცვისა და ყოველგვარი ეჭვის გასარკვევად, დღეს გავიარე ნარკოლოგიური ტესტი, რომლის შედეგებიც ცნობილი იქნება დაახლოებით ერთ კვირაში“, - აღნიშნა ფინეთის პრემიერმა.