მიუხედავად კრემლის მცდელობისა, გამოიყენოს ენერგია იარაღად და დაარღვიოს დასავლეთის გადაწყვეტილება უკრაინის მხარდასაჭერად, აშშ მოუწოდებს ევროპას, დარჩეს ერთიანი რუსეთის წინააღმდეგ სანქციების შენარჩუნებაში. ამის შესახებ CNN-ი ამერიკელ და ევროპელ ოფიციალურ პირებზე დაყრდნობით წერს.

როგორც გამოცემა აღნიშნავს, შეერთებულ შტატებში შიშობენ, რომ რუსეთის შეჭრით გამოწვეული ენერგიის ხარჯების სწრაფი ზრდის ფონზე, ევროპაში რუსეთზე სანქციების ზეწოლის მხარდაჭერა შეიძლება, შემცირდეს.

აშშ-ის დაზვერვის წარმომადგენლები მიიჩნევენ, რომ დასავლეთის ქვეყნებს შორის ერთიანობის განადგურება რუსეთის პრეზიდენტის, ვლადიმერ პუტინის მთავარი პრიორიტეტია.

„ჩვენ გვჯერა, რომ რუსეთის ქმედებებმა მხოლოდ გააძლიერა ერთიანობა ევროპელებს შორის. გზავნილი, რომელსაც რუსეთი უგზავნის ყველა ევროპელს, არის ის, რომ ისინი არასანდო პარტნიორები არიან. ამიტომ, მტრობა რუსეთის მიმართ მხოლოდ იზრდება“, - განაცხადა წყარომ.

მაგრამ აშშ-ის სხვა ოფიციალური პირები მიიჩნევენ, რომ არსებობს რეალური რისკი იმისა, რომ ენერგიის ხარჯების ზრდასთან და ზამთრის მოახლოებასთან ერთად, ევროპის მოსახლეობა შეიძლება, შეეწინააღმდეგოს რუსეთის ეკონომიკური იზოლაციის დასავლურ სტრატეგიას.