ახალი კონსერვატიული, საინფორმაციო-ანალიტიკური პორტალი

„საქართველო უპირველეს ყოვლისა“

www.geo-first.com

თანამედროვე მსოფლიოში გაბატონებული ახალი ტრენდები, მათი ტოტალური პროპაგანდა და აგრესიულად დანერგვის მცდელობა საფრთხეს უქმნის: ტრადიციულ ღირებულებებს, კულტურას, ადამიანის იდენტობას.

ამ იდეოლოგიამ შეაღწია ყველგან: მედიაში, პოლიტიკაში, ბიზნესში, აკადემიურ დაწესებულებებში, სკოლებში, ყოფით კულტურაში.

ყველა, ვისაც ტრენდისგან განსხვავებული თვალსაზრისი გააჩნია, გამოცხადებულია: ჰომოფობად, რასისტად, პრორუსად, „ბნელად“.

ნეოლიბერალიზმის ამგვარი ტოტალურობა და მისი თავსმოხვევის აგრესიული მეთოდები დღეს სასიცოცხლო პრობლემა ხდება არა მხოლოდ ჩვენი ქვეყნის მომავლისთვის, არამედ ზოგადად, ადამიანის იდენტობისთვის და მისი უცვლელი ღირებულებებისთვის: ღმერთი, სამშობლო, ოჯახი, მორალური წესრიგი, თავისუფლებისა და ვალდებულებების ბალანსი, კლასიკური კულტურა.

მიგვაჩნია, რომ ასეთი რთული გამოწვევების ფონზე, დღეს განსაკუთრებულ აქტუალობას იძენს კულტურული კონსერვატიზმის სულისკვეთება და ამიტომ გადავწყვიტეთ დაგვეფუძნებინა ახალი კონსერვატიული, საინფორმაციო-ანალიტიკური პორტალი სახელწოდებით - “ საქართველო უპირველეს ყოვლისა”.

www.geo-first.com

იმ ფონზე, როდესაც დასავლური რეალისტური და კონსერვატიული მიმართულების  ამბები ქართველი მკითხველისა და მაყურებლისთვის რთულად ხელმისაწვდომია, ახალი პორტალი უზრუნველჰყოფს დეკლარირებულ ღირებულებებთან შესაბამისი ახალი ამბების, ანალიტიკისა თუ სხვა ტიპის წერილობითი/ვიდეო კონტენტის მიწოდებას მომხმარებლისთვის. ჩვენ ვეცდებით, მხოლოდ ნამდვილი ამბების, ფაქტების და იმ პოზიციების გავრცელებით, რომლებიც ეწინააღმდეგებიან პოლიტკორექტულობას და ნეოლიბერალიზმის დღეს გაბატონებულ იდეოლოგიას, მოვიპოვოთ უპირატესობა მიმდინარე საინფორმაციო-პროპაგანდისტულ ომში.

ჩვენ, მხარს დავუჭერთ სამშვიდობო პოლიტიკას და ვკონცენტრირდებით ეროვნული ინტერესების დაცვაზე.

აღნიშნული პლატფორმა დაამყარებს კონტაქტებს ამერიკულ, ევროპულ და სხვა ქვეყნებში მოქმედ კონსერვატიულ  ორგანიზაციებთან, პოლიტიკურ და ანალიტიკურ წრეებთან.

ვებ-პლატფორმა ყოველდღიურ რეჟიმში განახლდება და მომხმარებელს შესთავაზებს საინტერესო, არამეინსტრიმულ მასალებს. ვებ-პლატფორმაზე განთავსდება სხვადასხვა საერთაშორისო წყაროებიდან ქართულ ენაზე ნათარგმნი სტატიები, ინტერვიუები, პოდკასტები. ასევე, გავრცელდება ადგილობრივი ავტორების ანალიტიკური წერილები, მომზადდება ინტერვიუები მაღალი კვალიფიკაციის მქონე, მიუკერძოებელ ექსპერტებთან.

ვებ-პლატფორმის “საქართველო უპირველეს ყოვლისა” დამფუძნებლები არიან: ვატო შაქარიშვილი; ირმა სანაძე; ნუცა ლომაძე; კოტო გაჩეჩილაძე.