„საგარეო ვაჭრობის გაუმჯობესების ტენდენციები გაგრძელდა ნოემბერშიც, ექსპორტის ზრდამ 14.1 პროცენტი, ხოლო წლის დასაწყისიდან საგარეო სავაჭრო ბრუნვის ზრდამ 32 % შეადგინა. ექსპორტის ზრდის ორნიშნა მაჩვენებელი პოზიტიურად უნდა შეფასდეს, მიუხედავად რეგიონში არსებული ეკონომიკური გამოწვევების და მაღალი ბაზისური ეფექტისა, როდესაც გასული წლის ნოემბერში კრიზისულ 2020 წელთან შედარებით ექსპორტის ზრდამ 27% შეადგინა, რასაც ემატება მიმდინარე წლის მეორე ნახევარში ლარის გამყარების ტენდენციებიც“, - ამის შესახებ ექსპერტი გიორგი ცუცქირიძე სოციალურ ქსელში წერს.
ექსპერტი გასული წლის ექსპორტს მიმდინარე წელს ადარებს და ამბობს, რომ წლის პირველ 10 თვეში ექსპორტის დინამიკური ზრდა აჩვენებს, რომ იზრდება როგორც ექსპორტის მოცულობა, ასევე მისი დივერსიფიკაცია, ქართული პროდუქციის ახალ პერსპექტიულ ბაზრებზე გასვლის კარგი პერსპექტივით:
„2022 წლის იანვარ-ნოემბერში ექსპორტი გაიზარდა 31.8 პროცენტით და 5 037.1 მლნ აშშ დოლარი შეადგინა. ნიშანდობლივია, რომ ჯერ კიდევ ოქტომბერში, იანვარ-ოქტომბრის ექსპორტის მოცულობა უკვე აჭარბებდა 2021 წლის წლიური ექსპორტის ჯამურ მოცულობას.
2022 წლის იანვარ-ნოემბერში სავაჭრო ბრუნვა 17 023.0 მლნ აშშ დოლარით განისაზღვრა, რაც წინა წლის შესაბამისი პერიოდის მაჩვენებელზე 32.2 პროცენტით მეტია.
2022 წლის იანვარ-ნოემბერში სავაჭრო დეფიციტი 1 723.5 მლნ აშშ დოლარით გაიზარდა და 6,948.9 მლნ. აშშ. დოლარი შეადგინა, რაც სავაჭრო ბრუნვის 40.8 %-ს შეადგენს.
წლის პირველ 10 თვეში ექსპორტის დინამიკური ზრდა აჩვენებს, რომ იზრდება როგორც ექსპორტის მოცულობა, ასევე მისი დივერსიფიკაცია, ქართული პროდუქციის ახალ პერსპექტიულ ბაზრებზე გასვლის კარგი პერსპექტივით. ამასთან შუა დერეფნის ფუნქციონალური დატვირთვის ზრდასთან ერთად, მზარდია როგორც ადგილობრივი პროდუქციის ექსპორტი, ასევე რეექსპორტიც“, - წერს გიორგი ცუცქირიძე.