მიმდინარე წლის დეკემბერში დაგეგმილ საქართველოს ეროვნული ოლიმპიური კომიტეტის საპრეზიდენტო არჩევნებზე ერთ-ერთი კანდიდატი 54 წლის ირაკლი მეძმარიაშვილი იქნება.

ცნობისთვის, სეოკ-ის წესდების თანახმად, ორგანიზაციის პრეზიდენტად შეიძლება აირჩეს დაბადებით საქართველოს მოქალაქე 35 წლის ასაკიდან, რომელსაც საქართველოში უცხოვრია 10 წელიწადი მაინც და არჩევნების დანიშვნის დღეს ცხოვრობს საქართველოში. სეოკ-ის პრეზიდენტის არჩევა ხდება ოთხი წლის ვადით და შესაძლებელია არჩეულ იქნას ხელმეორედ.

შეგახსენებთ, რომ მეძმარიაშვილი ქართული სპორტისთვის უცხო კაცი ნამდვილად არაა. ჯერ კიდევ 2002-2004 წლებში ის საქართველოს სპორტის სახელმწიფო დეპარტამენტის თავმჯდომარე გახლდათ, 2004-2008 წლებში საქართველოს ეროვნული ოლიმპიური კომიტეტის აღმასკომის წევრი იყო, ხოლო 2006-2009 წლებში - საქართველოს ეროვნული სტადიონის გენერალური დირექტორი. ამას გარდა, მეძმარიაშვილი ფიფა-ს საფეხბურთო აგენტია 2005 წლიდან, 2012-დან კი საქართველოს ეროვნული ოლიმპიური კომიტეტის წარმომადგენელია ევროპის ქვეყნებში.

საქართველოს ეროვნული ოლიმპიური კომიტეტი 1989 წლის 6 ოქტომბერს თბილისის ჭადრაკის სასახლეში გამართულ დამფუძნებელ კონფერენციაზე დაარსდა, რომელსაც 337 დელეგატი ესწრებოდა.

სეოკ-ის პირველ პრეზიდენტად მსოფლიოს ხუთგზის ჩემპიონი ჭადრაკში ნონა გაფრინდაშვილი აირჩიეს, ვიცე-პრეზიდენტებად კი - ვიქტორ სანეევი, თენგიზ გაჩეჩილაძე და პაატა ნაცვლიშვილი, გენერალურ მდივნად - დავით კინწურაშვილი.

1991 წლიდან 2008 წლამდე სეოკ-ის გენერალური მდივანი ემზარ ზენაიშვილი გახლდათ.

1996 წლის 13 დეკემბერს საანგარიშო-საარჩევნო სესიაზე სეოკ-ის მეორე პრეზიდენტად ჯანსუღ ბაგრატიონი აირჩიეს, ვიცე-პრეზიდენტებად - თამაზ იმნაიშვილი, რუსუდან სიხარულიძე და მამუკა ხაზარაძე.

2004-2007 წლებში სეოკ-ის პრეზიდენტი ბადრი პატარკაციშვილი იყო, ვიცე-პრეზიდენტები - ლერი ხაბელოვი და გოგი თოფაძე.

2008 წლის საანგარიშო-საარჩევნო სესიაზე სეოკ-ის პრეზიდენტად არჩეულ იქნა გია ნაცვლიშვილი, პირველ ვიცე-პრეზიდენტად - რამაზ გოგლიძე, ვიცე-პრეზიდენტებად - დავით გობეჯიშვილი და ვახტანგ გეგელია, ხოლო გენერალურ მდივნად - ალექსანდრე ბითაძე.

2012 წელს გამართულ საანგარიშო-საარჩევნო სესიაზე აირჩიეს სეოკ-ის ახალი ხელმძღვანელობა: პრეზიდენტი - ლერი ხაბელოვი, პირველი ვიცე-პრეზიდენტი - ელგუჯა ბერიშვილი, ვიცე-პრეზიდენტები - ნინო სალუქვაძე და მამუკა ხაბარელი, გენერალური მდივანი - ემზარ ზენაიშვილი.

1992 წლის 9 მარტს საერთაშორისო ოლიმპიურმა კომიტეტმა სეოკ-ი დროებით და პირობითად აღიარა, 1993 წლის 23 სექტემბერს მონაკოში გამართულ სოკ-ის 99-ე სესიაზე კი თავის სრულუფლებიან წევრად მიიღო.

სეოკ-ს აქვს განსაკუთრებული უფლება საქართველო წარადგინოს ოლიმპიურ თამაშებზე და სეოკ-ის სხვა შეჯიბრებებზე. იგი ადგენს და ხელმძღვანელობს საქართველოს ოლიმპიურ დელეგაციებს. მონაწილეობს ოლიმპიური სოლიდარობის პროგრამებში.

საქართველოს ეროვნული ოლიმპიური კომიტეტი მოქმედებს განუსაზღვრელი ვადით და მოწოდებულია ხელი შეუწყოს ოლიმპიური მოძრაობისა და სპორტის განვითარებას ქვეყანაში.

წყარო :