მცირე და საშუალო ბიზნესის წარმომადგენლეთან საქართველოს პრემიერ-მინისტრ გიორგი კვირიკაშვილის შეხვედრა ბიზნესმენებმა შეაფასეს.

კომპანია „ჯორჯიან პროდაქტის" დამფუძნებელ დავით ბარდაველიძის თქმით, ბიზნესმენები მთავრობის ეკონომიკური გუნდით კმაყოფილები არიან.

„ზოგადად, ჩვენ კმაყოფილი ვართ მიდგომით და დამოკიდებულებით დღევანდელი ეკონომიკური გუნდის, რადგან კომუნიკაცია არის არამარტო ამ შეხვედრების, არამედ ყოველდღიურ რეჟიმში, რომლის ფარგლებშიც ყოველდღიური პრობლემები წყდება. ჩვენ 100%-ით საექსპორტო კომპანია ვართ და ქვეყანაში არის ლაბორატორიების არქონის პრობლემა, რომელიც ნედლეულს გადაამოწმებს. ამისთვის საჭიროა თანამედროვე ლაბორატორიები. ბევრი აქვთ ნამუშევარი. ამ მიმართულებით, წინ მივდივართ და საქართველოში იქნება ისეთი ლაბორატორია, რომელიც გადაამოწმებს ჩვენ მიერ ნაყიდ ნედლეულს. ასეთი სახის ტექნიკური საკითხებია.

საერთო ჯამში, ძალიან კარგი მიმართულებით მიდის. ვფიქრობ, ასეთი რამ, 20 წლის განმავლობაში არ ყოფილა, რადგან არის უშუალო დამოკიდებულება", - განაცხადა ბარდაველიძემ.

კითხვაზე, როგორ აფასებს პრემიერის ინიციატივას, რომელიც გულისხმობს ეკონომიკური დანაშაულისთვის წინასწარი პატიმრობის შესაძლო გაუქმებას, ბარდაველიძემ განაცხადა, რომ სახელმწიფოს მხრიდან მიდგომები უკვე შეცვლილია.

„ჩასაფრებული კუთხიდან საგადასახადო ოფიცერი არ გიყურებს. ამასთან, სახელმწიფოს მხრიდან, თუნდაც, ჯარიმების კუთხით მიდგომა ლიბერალურია", - აღნიშნა ბიზნესმენმა.