„ის, რომ ყველას ევროპა გვინდა, ამაში სადაო არაფერია. მხოლოდ ვერ ვთანხმდებით, ცალი ფეხით და სრული მორჩილებით, თუ ორ ფეხზე მდგარი და ღირსებით,“ - განაცხადა დიმიტრი ხუნდაძემ.

„ქვეყანაში დაძაბულობა ქვეყნის სტაბილურობასა და მშვიდობას უქმნის საფრთხეს. ვდაობთ იმაზე, რაც სადაო არ არის. ყველას გვინდა ევროპა, მაგრამ ვისაც ცალ ფეხზე დგომით და სრული მორჩილებით სურს, ის „პროევროპელია“,  ვისაც ღირსებით უნდა უკეთესი ევროპა, ის „პრორუსი“. იქნებ გამოსავალი იმაშია, რომ ყველა ვიყოთ პროქართველი და თითოეული ჩვენგანის უპირატესი ინტერესი ჩვენი სამშობლო, ერთმანეთზე ზრუნვა და არა მტრობა იყოს. ისედაც დიდია საფრთხეები და რაოდენობრივად ცოტანი ვართ. თუ ღირსებას, პრინციპულობას, უკეთესი ევროპის სურვილს ან თუნდაც განსხვავებულ აზრს რუსეთუმეობას დავარქმევთ, თავად შეუწყობთ ხელს რუსული ინტერესების რეალიზებას საქართველოში. ჩვენ ოჯახში ერთმანეთს ვეუბნებით - „მე ვარ ქართველი და მსურს უკეთესი ევროპა“. დღეს ვინც ახალგაზრდებს აგრესიისკენ მოუწოდებს, თავად არის მათივე მომავლის მტერი. ეს არის იმ სცენარის გაგრძელება, რისთვისაც მიხეილ სააკაშვილი ქვეყანაში იქნა შემოყვანილი.

საქართველოს მტერს სურს ქვეყანაში ძმათაშორის დაპირისპირება, სისხლისღვრა და უკრაინის ომში ჩართვა. და ეს ყველაფერი მხოლოდ იმიტომ სურთ, რომ ხელისუფლება ხელში ჩაიგდონ. საზოგადოება და განსაკუთრებით, ახალგაზრდობა კი კიდევ ერთხელ მოტყუებული რჩება მათგან.  მოვუწოდებ ყველას, რადგან ორივე მხარის მიზანი ევროპული გზაა, ამ გზაზე ღირსებით ვიაროთ პროქართული პოლიტიკით და ეროვნული ინტერესებით. მხოლოდ მაშინ ექნება ჩვენს ბრძოლას გამართლება. და თუ ვინმეს ესეც არ ესმის, და თუ ვინმემ პოლიტიკური კეკლუცისთვის ჩემი და ჩემი კოლეგების მხრიდან სამშობლოს გულწრფელი სიყვარული ღალატად მონათლა, იმიტომ, რომ მათ ეს ვიღაცამ უთხრა ან წაკითხვა დაეზარა, თქვენ ხართ საშიში ქვეყნისთვისაც, ახლობლობისთვისაც და მეგობრობისთვისაც. ლიბერალური ფაშიზმი ვერც მე და ვერც ჩემს მეგობრებს ვერ გაგვაჩუმებს. სამშობლოს სიყვარულს კი საეჭვო სიჩუმეც აზიანებს“, - აღნიშნავს დიმიტრი ხუნდაძე.