„ერთგვარი დალოცვის ფორმა შეიძინა სიტყვებმა, - „გაძლება მოგცეს ღმერთმა“! ახლობლები, ნაცნობები, უცხო ადამიანები ამ სიტყვებს ხშირად მეუბნებიან. არაა იოლი გასაძლები! ვიცით, ვის რის ფასად უჯდება პატივისა და ღირსების შელახვის დათმენა?! უფლის წყალობით, მე ვუძლებ; აი, დათო ტურაშვილი კი, სამწუხაროდ, საავადმყოფოში მოხვდა! მინდა, ჯანმრთელობა ვუსურვო მას და ასევე ვისურვო, რომ ჩვენი საზოგადოება მეტად დაუფიქრდეს მის ნათქვამს, რომ სიტყვებიც შეიძლება მკვლელობის იარაღად იქცეს!“ - ამის შესახებ საპატრიარქოს პრესსამსახურის უფროსი ანდრია ჯაღმაიძე სოციალურ ქსელში წერს.

როგორც ჯაღმაიძე აღნიშნავს, კარგია, რომ ტელევიზიებმა დაინახეს, რომ მკვლელობის, სამშობლოს ღალატისა და სხვა ცილისწამებათა დაბრალება ცუდი საქციელია და აქვე სვამს კითხვას, მოერიდებიან თუ არა მედიასაშუალებები თავადაც ამგვარ საქციელს, რადგან ინტერნეტსივრცე ისეთი რეალობაა, თუ იქ ერთხელ რამე მოხვდა, მუდმივად რჩება:

„ახლა კონკრეტულს არაფერს შევახსენებ ტელევიზიებს, რომლებსაც არაერთხელ ანალოგიური რამ გაუკეთებიათ, და მათ შორის ჩემს მიმართაც, ინტერნეტსივრცე კი, ისეთი რეალობაა, რომ, თუ იქ ერთხელ რამე მოხვდა, მუდმივად რჩება და მუდმივად შეგვახსენებს ამას. ამ ტელევიზიების საყურადღებოდ მინდა ვთქვა: კარგია, დათო ტურაშვილს რომ ექომაგებით, მართლაც დაინახეთ, რომ მკვლელობის, სამშობლოს ღალატისა და სხვა ცილისწამებათა დაბრალება ცუდი საქციელია?! იმედი ვიქონიოთ, რომ ხვალიდან ამგვარ უღირს საქციელს თავადაც მოერიდებით? ან შენდობას ითხოვთ უკვე ჩადენილზე? ან ამ პოსტს მშვიდად და გაცნობიერებულად მიიღებთ?“ - წერს ჯაღმაიძე ფეისბუქზე.