„ქართული ოცნების“ წევრი ირმა ზავრადაშვილი პრეზიდენტ სალომე ზურაბიშვილის ინტერვიუს ეხმაურება, სადაც მან ყოფილი პრემიერის ბიძინა ივანიშვილის მიმართ გააკეთა განცხადებები.

ზავრადაშვილი ზურაბიშვილს ურჩევს, ივანიშვილის კრიტიკისგან თავი შეიკავოს.

„პრეზიდენტის განცხადებების შეფასებისგან თავს შევიკავებ მრავალი მიზეზის გამო - აქედან ერთ-ერთი მთავარი არის ის, რომ ქალია. რაც შეეხება ბიძინა ივანიშვილს, მე არ ვიცი... მეტი პატრიოტი საქართველოს თანამედროვეობას არ ჰყოლია და ეჭვი მეპარება, დიდი ხნის განმავლობაში მეტი პატრიოტული სულით რომელიმე ადამიანი გამოირჩეოდეს. ბიძინა ივანიშვილი არის ამ ერის კაცი, რომელმაც ძალიან ბევრი რამ მსხვერპლად გაიღო იმიტომ, რომ თავისი სამშობლო შიდა და გარე მტრებისგან აქტიურად დაეცვა, რომ აღარ ვილაპარაკოთ მილიარდობით ლარობით ჩადებაზე, რაც საქართველოს განვითარებას ხელს შეუწყობდა. ივანიშვილი უამრავი რეფორმის ავტორია ჯერ კიდევ ჩვენ ხელისუფლებაში მოსვლამდე და მას შემდგომ ხომ ლაპარაკი ზედმეტია. ბიძინა ივანიშვილის კრიტიკას არც სალომე ზურაბიშვილს და არავის არ ვურჩევდი - გავა დრო და შეიძლება, მისი კრიტიკა ადამიანს სანანებელი გაუხდეს. ბიძინა ივანიშვილის შრომა დაუფასებელია“, - განაცხადა ზავრადაშვილმა.

ზურაბიშვილმა 24 მარტს ტვ „პირველის“ ეთერში განაცხადა, რომ ივანიშვილი ოლიგარქია.

„კი ოლიგარქია [ივანიშვილი] იმ გაგებით, რომ ფული აქვს, აქვს მედიასა და პოლიტიკაზე გავლენა, ამ გაგებით არის. ოლიგარქიის პრობლემა არის მეტი, ვიდრე ივანიშვილი და ივანიშვილის პრობლემაა მეტი, ვიდრე ოლიგარქიზმი“, - თქვა პრეზიდენტმა.