„ხალხის ძალის“ წევრი  ანალიტიკოსი ზურაბ ქადაგიძე ფეისბუკის საკუთარ გვერდზე ეხმაურება მამუკა მდინარაძის განცხადებას, რომელმაც თქვა, რომ: „ბრეივიკმა ხელი თავად გამოკრა სასხლეტს, ხოლო მიხეილ სააკაშვილმა შექმნა სისტემა, სადაც სასხლეტზე ხელის გამომკვრელი ბევრი ადამიანი იყო“.

„უფრო მეტიც, ბრეივიკმა სასტიკი დანაშაული ჩაიდინა და მიეზღო ნორვეგიული კანონმდებლობის შესაბამისად... სააკაშვილმა კი სისტემა შექმნა, რომელიც პირდაპირ ახორციელებდა ადამიანთა მოკვდინებას, დაშინებას, ტერორსა და შანტაჟს. ახლა სამართალს არ ცნობს, საზოგადოებას შეურაცხყოფას აყენებს და უფრო მეტიც, 10 წლის შემდეგაც, იმავე სისტემის რეინკარნაციას ცდილობს. აქედან გამომდინარე, რთულია განასხვავო ერთიმეორისგან აღიარებული და დე-ფაქტო ტერორისტი, როგორც ბრეივიკი და სააკაშვილი.

„ნაცმოძრაობამ“ იმაზე დიდი დანაშაულებრივი მემკვიდრეობა და იდეოლოგიური ტრავმა დაუტოვა ქართულ საზოგადოებას, ვიდრე ნორვეგიის ელჩს წარმოუდგენია. ამ კატასტროფული შედეგების განეიტრალებას თაობები ესაჭიროება... ასე რომ, სამართლიანი შეფასების შემთხვევაში, ნორვეგიის ელჩის შეშფოთება, უფრო სააკაშვილის დანაშაულების მასშტაბებთან შედარებას უფრო უნდა აეღელვებინა, ვიდრე - პირიქით“, - აღნიშნავს ზურაბ ქადაგიძე.