ხვიჩა კვარაცხელიამ იტალიის ჩემპიონატის შეხვედრა „ვერონასთან“ სათადარიგოთა სკამიდან დაიწყო. დაძაბულ დაპირისპირებაში სერია A-ს ლიდერმა „ნაპოლიმ“ ქულები დაკარგა, 0:0.

თავისი ვარსკვლავების, ვიქტორ ოსიმენისა და ხვიჩა კვარაცხელიას გარეშე „ნაპოლი“ პირველ ტაიმში უფერულად გამოიყურებოდა.

ქართველი შემტევი მოედანზე 64-ე წუთზე გამოჩნდა, 72-ე წუთზე კი სპალეტიმ თამაშში ოსიმენიც ჩართო, რომელმაც სანაკრებო პაუზის შემდეგ პირველად ითამაშა. მათთან ერთად მინდორზე ლობოტკა და ზიელინსკიც შევიდნენ.

თუმცა, „ნაპოლიმ“ სასურველ შედეგს ვერ მიაღწია და მხოლოდ ქულა მოიპოვა, 0:0. ამის მიუხედავად, ნეაპოლელები 30 ტურის შემდეგ 75 ქულით პირველ ადგილზე არიან.

ლუჩანო სპალეტის გუნდი შემდეგ შეხვედრას „მილანთან“ ჩემპიონთა ლიგაზე 18 აპრილს გამართავს. მეოთხედფინალური ეტაპის პირველი დაპირისპირება „ნაპოლიმ“ 0:1 წააგო. „ვერონასთან“ ქართველის დასვენებაც სწორედ მომავალ თამაშს უკავშირდება.