სასჯელაღსრულებისა და პრობაციის სამინისტრო გაქცეული პატიმრის ოთარ ვარამაშვილის დის განცხადებას ეხმაურება, იმის შესახებ, რომ თითქოს ოჯახს ბოლო ორი თვის განმავლობაში მსჯავრდებულთან კონტაქტისა და მისი ნახვის საშუალება არ ჰქონდა.

განცხადებაში ნათქვამია, რომ მსჯავრდებულს ბოლო პაემანი დედასთან მიმდინარე წლის 12 აგვისტოს ჰქონდა.

„ოთარ ვარამაშვილს  ხანმოკლე პაემანი ბოლოს ჰქონდა დედასთან მიმდინარე წლის 12 აგვისტოს.

რაც შეეხება სატელეფონო საუბარს, სამინისტრომ თავის განცხადებაში ერთხელ უკვე აღნიშნა, რომ ვარამაშვილი სასჯელის მოხდის პერიოდში ხშირად არღვევდა სარეჟიმო მოთხოვნებს.  დადგენილი მოთხოვნების დარღვევის შემთხვევაში კი, პატიმრის მიმართ შესაძლებელია გამოყენებულ იქნას სხვადასხვა დისციპლინური სახდელი, მათ შორის სატელეფონო საუბრის უფლების შეზღუდვა არაუმეტეს 3 თვის ვადით. ბრალდებულს/მსჯავრდებულს უფლება აქვს  დისციპლინური ღონისძიების გამოყენების შესახებ განკარგულება გაასაჩივროს სასამართლოში. სწორედ აღნიშნული უფლება გამოიყენა მსჯავრდებულმა ოთარ ვარამაშვილმა და 2016 წლის 31 აგვისტოს პატიმარი გაყვანილ იქნა რუსთავის საქალაქო სასამართლოში", - აღნიშნულია სამინისტროს განცხადებაში.