პარალელურად ქარის ტურბინების დასამონტაჟებლად, სხვა ადგილების მოძიებაც მიმდინარეობს. ეს საპილოტე პროგრამაა, რომლის ტესტირებაც თვის ბოლოდან დაიწყება.

„29 სექტემბრისთვის სრულად დასრულდება სარემონტო სამუშაოები. უკვე ოქტომბრის თვის პირველ ნახევარში დავიწყებთ ელექტროენერგიის გამომუშავებას ტესტირების რეჟიმში, რომელსაც მივაწვდით საქართველოს ელექტროსისტემას და ტესტირების ეტაპი დასრულდება ნოემბრის ბოლოსთვის, ხოლო ექსპლუატაციის კუთხით დეკემბერში შევა სრულად ექპლუატაციაში და მოხდება ელექტროენერგიის გამომუშავება", - აცხადებს მამუკა კობახიძე.

გორის მუნიციპალიტეტში ტურბინები სახელმწიფო სახსრებით შენდება. 24 მლნ EBRD-ის სესხია, დამატებითი 6 მლნ კი ენერგეტიკის განვითარების ფონდისა და ნავთობისა და გაზის კორპორაციის სახსრებია. გორის პარალელურად ქარის პოტენციალის შესწავლა სხვადასხვა რეგიონებში მიმდინარეობს. მათ შორის ზესტაფონში, ფოთში, საჩხერეში, რუსთავსა და სამგორში.

„ჩემი დანიშვნის პირველივე დღიდან, ჩემს გუნდთან ერთად, მთავრობასთან ერთად დავიწყეთ ამ პროექტის განხორციელება და ბავშვივით მიხარია, რომ ეს პროექტი დასასრულს უახლოვდება. ჩვენ, რა თქმა უნდა, ხელს შევუწყობთ ასეთი პროექტების განხორციელებას. თუმცა, ჩანაცვლება ერთი პროექტით, მაგ. ქარის პროექტით შეუძლებელი იქნება თბოელექტროსადგურების ჩანაცვლება, ასევე თბოელექტროსადგურებით შეუძლებელი იქნება ჰიდროელექტროსადგურების ჩანაცვლება. ეს ყველაფერი ერთობლივად ძალიან მნიშვნელოვანია, საინტერესოა და ხელს უწყობს ჩვენი ქვეყნის ენერგეტიკულ და ეკონომიკურ განვითარებას", - განაცხადა კახა კალაძემ.