საქართველოს პრემიერ-მინისტრმა ირაკლი ღარიბაშვილმა ქუთაისში საქართველოს ფეხბურთის ფედერაციის აკადემია დაათვალიერა.

პროექტის მიხედვით ადგილზე ორი ხელოვნური და ორი ბუნებრივსაფარიანი მოედანი მოეწყო. ოთხივე მოედანი აღიჭურვა განათების სისტემით, ორ მოედანზე კი მოეწყო ტრიბუნა. აკადემიის ტერიტორიაზე ასევე აშენდა საცხოვრებელი კორპუსი, სადაც გასახდელები, სასადილო, საკონფერენციო, სავარჯიშო და სხვადასხვა ადმინისტრაციული ოთახები მოეწყო.

აღნიშნული ინფრასტრუქტურით საქართველოს ფეხბურთის ფედერაციის იმერეთის აკადემიის 14 და 15-წლამდე გუნდები ისარგებლებენ. აკადემიის აღსაზრდელების გარდა, კომპლექსის გამოყენება ადგილობრივ საფეხბურთო სკოლებს, მოყვარულთა და ქალთა გუნდებს სრულიად უფასოდ შეეძლებათ.

ქალთა და ვაჟთა ასაკობრივი ნაკრები გუნდები კომპლექსს შეკრებებისთვის, საერთაშორისო და ოფიციალური მატჩებისთვის გამოიყენებენ.

საქართველოს ფეხბურთის ფედერაციას აკადემიის მშენებლობისთვის მიწა ეკონომიკის სამინისტროს ქონების ეროვნული სააგენტოსგან საფეხბურთო ინფრასტრუქტურის მოწყობის ვალდებულებით გადაეცა. აღნიშნული პროექტი ფეხბურთის ფედერაციის, ფიფა-ს პროგრამა FORWARD-ისა და უეფა-ს HatTrick-ის დაფინანსებით განხორციელდება. აკადემიის მშენებლობა 2020 წლის ბოლოს დაიწყო და მშენებლობისთვის 10 მილიონ ლარამდე დაიხარჯა.

ქუთაისის საფეხბურთო აკადემია უკვე მეხუთეა, რომელიც ფეხბურთის ფედერაციამ აღნიშნული პროექტის ფარგლებში განახორციელა. ქუთაისის გარდა საფეხბურთო აკადემიები ლაგოდეხში, რუსთავში, გვიმბალაურსა და რუხში აშენდა.

პრემიერ-მინისტრთან ერთად ფეხბურთის ფედერაციის აკადემიაში აღმასრულებელი, საკანონმდებლო, ადგილობრივი ხელისუფლების და საქართველოს ფეხბურთის ფედერაციის წარმომადგენლები იმყოფებოდნენ.