„კანონში იცვლება ერთადერთი რამ - ეროვნულ ბანკში დამატებით ჩნდება პირველი ვიცე-პრეზიდენტის თანამდებობა. სავალუტო ფონდი კი ამბობს, რომ ამ თანამდებობის შემოტანით საფრთხე ექმნება ეროვნული ბანკის დამოუკიდებლობას, თუმცა, ამის დასამტკიცებლად ვერავითარი არგუმენტი ვერ მოჰყავს“,  - ამის შესახებ ეკონომიკის ექსპერტი, ანდრია გვიდიანი სოციალურ ქსელში წერს.

მისი შეფასებით, სავალუტო ფონდის მიერ ეროვნული ბანკის შესახებ კანონში შესატანი ცვლილებების თაობაზე უარყოფითი შეფასება იმის დასტურია, რომ სავალუტო ფონდს  ეროვნულ ბანკში დღეს არსებული ვითარება მოსწონს, ვინაიდან არჩილ მესტვირიშვილი, რომელიც  ეროვნული ბანკის პრეზიდენტის მოვალეობას ასრულებს, მზადაა მათი ნებისმიერი დავალება შეასრულოს.

„სავალუტო ფონდს მოსწონს ეროვნულ ბანკში დღეს არსებული ვითარება, როდესაც ბანკს არა საქართველოს სამსახურში მყოფი საჯარო მოსამსახურე, არამედ მათი აგენტი მართავს. სალომე ზურაბიშვილსაც იმიტომ გააჩერებინეს ეროვნული ბანკის საბჭოს ახალი წევრების წარდგენა, რომ ეროვნული ბანკის პრეზიდენტის მოვალეობის მოქმედმა შემსრულებელმა პოზიციები არ დაკარგოს. ესაა მთელი არითმეტიკა, რომელიც კანონის კრიტიკისა და საბჭოს წევრების არწარდგენის უკან დგას.

ეროვნული ბანკის პრეზიდენტის მოვალეობას დღეს ასრულებს არჩილ მესტვირიშვილი, რომელიც თავიდან ბოლომდე სავალუტო ფონდის მიერ იმართება და მზადაა, ნებისმიერი მათი დავალება შეასრულოს. ისიც უნდა აღინიშნოს, რომ მესტვირიშვილი ნაცმოძრაობის ხელისუფლების სტაჟიანი კადრია, რომლის კარიერული აღმასვლა 2004 წლიდან იწყება, როდესაც ის სააკაშვილის ადმინისტრაციაში საფინანსო-ეკონომიკური სამსახურის უფროსად დაინიშნა. ეროვნული ბანკის ვიცე-პრეზიდენტი ის 2009 წელს გახდა და როგორც ამბობენ, არაფორმალური სუბორდინაციით ვანო მერაბიშვილს ექვემდებარებოდა. მისი სტატუსიდან გამომდინარე, მესტვირიშვილი ვერ იტყვის უარს ვერცერთი ისეთი დავალების შესრულებაზე, რომელმაც ქართული ეკონომიკის ზრდა შეიძლება შეაფერხოს ან ინფლაციის თუ დევალვაციის კუთხით ქვეყანას პრობლემები შეიძლება შეუქმნას.

ამის ერთ-ერთი მაგალითია მესტვირიშვილის მიერ 2-3 კვირის წინ მიღებული გადაწყვეტილება, რომელთან დაკავშირებითაც მას მთავრობასთან ელემენტარული კონსულტაციებიც კი არ გაუვლია. კერძოდ, ეროვნული ბანკის გადაწყვეტილებით, რუსეთის რეზიდენტების მიერ ქართულ ბანკებში განთავსებული დეპოზიტებისთვის გადინების განაკვეთი 30-40 პროცენტიდან 80 პროცენტამდე გაიზარდა, რაც ნიშნავს, რომ ჩვენი ბანკები აღნიშნული თანხების 80 პროცენტს ეკონომიკურ ბრუნვაში ვეღარ გამოიყენებენ. ბუნებრივია, ეს გადაწყვეტილება ქართული ბანკების მიმზიდველობასა და მათ მიერ ეკონომიკაში ჩასადებ ინვესტიციებს შეამცირებს, ქვეყანაში უცხოური ვალუტის შემოდინებას შეაფერხებს და პირიქით, ქვეყნიდან ვალუტის გადინებას შეუწყობს ხელს. საბოლოო ჯამში, ეროვნული ბანკის გადაწყვეტილება უარყოფითად იმოქმედებს ეკონომიკის ზრდაზე, ლარის კურსზე და ინფლაციურ პროცესებსაც წაახალისებს. აქვე ისიც უნდა აღინიშნოს, რომ რუსეთის რეზიდენტები, რომლებიც ქართულ ბანკებში სავალუტო დეპოზიტებს ხსნიან, უმეტესწილად, რუსეთში მცხოვრები ქართველები და მათი კომპანიები არიან“, - წერს ანდრია გვიდიანი Facebook-ზე.