„არაერთი კვლევა ადასტურებს, რომ საქართველო გაცილებით წინ არის, ვიდრე ასოცირებულ ტრიოში შემავალი ქვეყნები (უკრაინა, მოლდოვა). მეორე რეალობაა, თუ რაოდენ აქტუალურია საქართველო და რამდენად საქართველოს საჭიროებს ევროპა“, - ამის შესახებ გადაცემაში „პოლტ ანალიტიკა“ „ხალხის ძალის“ წევრმა ზურაბ ქადაგიძემ განაცხადა.

მისი თქმით, საქართველოს პრემიერ-მინისტრის ვიზიტები ევროპაში და ევროპიდან გაჟღერებული პოზიტიური გზავნილები საქართველოს მისამართით, იძლევა იმის იმედს, რომ დეკემბერში საქართველო ევროკავშირის წევრობის სტატუსს მიიღებს.

„პირველ რიგში, აუცილებლად აღსანიშნია ბატონი პრემიერ-მინისტრის გააქტიურება, რაც ამ ბოლო ხანებში ჩანს (აზიური და ევროპული მიმართულებით) იმიტომ, რომ საინტერესოა ერთი რამ - პრემიერის საგარეო პოლიტიკა ხასიათდება არა მხოლოდ ერთ ვექტორზე დამოკიდებულებით, რაც ძალიან კარგია. აზიური თვალსაზრისით ის იყენებს სხვადასხვა ეკონომიკურ პლატფორმებს, რომელ პლატფორმებზეც საქართველო პოზიტიურად არის წარმოჩენილი, რაც თავისთავად მოიტანს ძალიან კარგ შედეგებს გარკვეული დროის შემდეგ.

აქ არის მეორე მომენტიც, რაც პრემიერ-მინისტრის ევროპულ სტრუქტურებთან ურთიერთობაში და ევროპის თვალსაზრისით დაგეგმილ საგარეო ვიზიტებში გამოიყენება - ამ პერსპექტივის იმ რეალობად ქცევა, რისი მოლოდინიც გვაქვს და რომელიც შეეხება სტატუსს, რაც სამწუხაროდ, შარშან პოლიტიკური გადაწყვეტილების შესაბამისად არ მოგვანიჭეს.

მაშინ საუბრობდნენ ე.წ. გეოპოლიტიკაზე და საქართველოს გეოგრაფიულ მდებარეობაზე, ჩემი აზრით ეს უფრო მიზეზი იყო. სინამდვილეში, სამწუხაროდ, გარკვეული პოლიტიკური კონიუნქტურის მიხედვით მოხდა ამ გადაწყვეტილების მიღება. თუმცა დღევანდელი შესანიშნავი ვიზიტი, რომელიც პრემიერ-მინისტრმა შეხვედრების სახით წარმოგვიდგინა (შეხვდა არაერთი სტრუქტურის ხელმძღვანელს), ის პოზიტიური გზავნილები, რომლებიც გაკეთდა საქართველოს მისამართით - იძლევა იმის პირობას, გაცილებით ახლოს არის დეკემბრის გადაწყვეტილებასთან ის, რომ საქართველო მიიღებს აუცილებლად სტატუსს. ეს არ არის მხოლოდ და მხოლოდ პოლიტიკური მიზანშეწონილობიდან გამომდინარე. ეს გეოპოლიტიკურმა ვითარებამაც მოიტანა. არაერთი კვლევა ადასტურებს, რომ საქართველო გაცილებით წინ არის, ვიდრე ასოცირებულ ტრიოში შემავალი ქვეყნები (უკრაინა, მოლდოვა). მეორე რეალობაა, თუ რაოდენ აქტუალურია საქართველო და რამდენად საქართველოს საჭიროებს ევროპა, იმიტომ, რომ ჩვენ ვხედავთ გეოპოლიტიკურ ვითარებას, როდესაც მთლიანი რკალი შემორღვეულია (რუსეთ-უკრაინის ომს ვგულისხმობ). ერთადერთი, დემოკრატიული ფანჯარა, რომელიც არის ყველაზე მდგრადი და ღირსეული პარტნიორი დასავლური სტრუქტურებისთვის, ეს საქართველოა. ეს ვიზიტი, რომელიც დღეს ბრიუსელში ჰქონდა პრემიერ-მინისტრს, კიდევ ერთი წინ გადადგმული ნაბიჯია, გამომდინარე იმ პოზიტიური გზავნილებიდან, რაც ევროსტრუქტურების ხელმძღვანელობამ გააკეთა“, - განაცხადა ზურაბ ქადაგიძემ.