„კოტე კემულარიას ყოველთვის ჰქონდა ახლო, აგენტურული ურთიერთობები პუტინის მარჯვენა ხელთან, რუსეთის უშიშროების საბჭოს ამჟამინდელ მდივან ნიკოლოზ პატრუშევთან“, - ამის შესახებ სოციალურ ქსელში „ხალხის ძალის“ წევრი, ანალიტიკოსი დავით ქართველიშვილი წერს.

მისი თქმით, გუშინ ტელეკომპანია ობიექტივის ეთერში ყოფნისას გაიგო ექსკლუზიური ინფორმაცია კოტე კემულარიას მოსკოვში გასაიდუმლოებული ვიზიტის შესახებ,

„ობიექტივის“ პირდაპირ ეთერში, გადაცემის უკანასკნელ წუთზე დიმიტრი ლორთქიფანიძემ გაგვანდო ექსკლუზიური ინფორმაცია: „თბილისი-მოსკოვის პირდაპირი რეისით, 23 მაისს ისარგებლა ნაცების ღვაწლმოსილმა იდეოლოგმა კოტე კემულარიამ, რომელსაც რუსეთის პრეზიდენტის ადმინისტრაციაში ჰქონდა შეხვედრები“.

რატომღაც არ გამიკვირდა. კოტე კემულარიას ყოველთვის ჰქონდა ახლო, აგენტურული ურთიერთობები პუტინის მარჯვენა ხელთან, რუსეთის უშიშროების საბჭოს ამჟამინდელ მდივან ნიკოლოზ პატრუშევთან. რუსეთის ფედერაციაში ელჩად მუშაობის პერიოდში ეს ურთიერთობები კიდევ უფრო გამყარდა და როგორც ვხედავთ, არც ამჟამად შეწყვეტილა.

ძალიან საინტერესოა, რომ კოტე კემულარიასთან ერთდროულად, მოსკოვში გაფრინდა სააკაშვილის მოძღვარი მეუფე ნიკოლოზიც (საპატრიარქოსთან შეთანხმების გარეშე) - ეს ფაქტი კი უკვე იმ კატეგორიიდანაა, ერთდროულად ამერიკის ერთსა და იმავე ქალაქის, ერთსა და იმავე სასტუმროს, ერთსა და იმავე სართულზე სრულიად „შემთხვევით“ სააკაშვილი და გახარია რომ ვიხილეთ თავის დროზე.

საქართველოში ორი დღის განმავლობაში მიმდინარე „მევარპრიგოჟინი“-ს ოპერაციის ფონზე (მეორე ფრონტის გახსნის მერამდენე წარუმატებელი მცდელობის ელემენტებით), ეს ორმაგი „შემთხვევითი“ ერთდროული ვიზიტი: ნიკოლოზ პატრუშევთან (დიდი ალბათობით) და პატრიარქ კირილესთან - ოპერატიული და პოლიტიკური თვალსაზრისით ძალზე საინტერესოც არის და ყურადსაღები“, - წერს დავით ქართველიშვილი.