„აკერმანის“ ფული ათვისებულია, საქმე შესრულებულია. სააკაშვილის გამო იმ პრეცედენტს ვერ დაუშვებდნენ, რომ არაჯეროვნად შეევსოთ ამ რუსული კანონით გათვალისწინებული ვალდებულება, თუნდაც ეს ამერიკის ხელისუფლებისთვის წაგებიან ნარატივს მოიცავდეს“, - ამის შესახებ „ხალხის ძალის“ წევრმა დავით ქართველიშვილმა სოციალურ ქსელში დაწერა.

მისი თქმით, აშშ-ის საელჩოს ზოგიერთი თანამშრომელი ალასანია-სააკაშვილის დეზინფორმაციულ, „ლობისტურ“ კამპანიაში იყვნენ ჩართულნი.

„ამერიკული რუსული კანონი FARA-ს მოთხოვნის ფარგლებში აშშ-ის იუსტიციის სამინისტროს საიტზე ამერიკული იურიდიული კომპანია „აკერმანის“ მიერ ატვირთულ ანგარიშში გამოჩნდა საქართველოში საელჩოს თანამშრომელი ევან ელიოტი, რომელიც ალასანია-სააკაშვილის ოჯახის დაკვეთით ჩართული იყო ხელშეკრულებით გათვალისწინებულ „ლობისტურ“ საქმიანობაში. როდესაც შემოგთავაზეთ ჩემი „პუბლიცისტური სერიალის“ პირველი სეზონი, აშშ-ის საელჩოს კონკრეტული თანამშრომლების დასახელებას ამ ეტაპზე თავი ავარიდე. მიუხედავად იმისა, რომ ეჭვი არ მეპარებოდა მათ უშუალო ჩართულობაში ნაცების მიერ ამ ხელისუფლების „ასაყირავებელ“ გეგმებში, ალბათ, იმ ტიპის საჩუქარს ველოდებოდი, ამერიკულმა რუსულმა კანონმა რომ „ჩაგვისიურპრიზა“.

დიახ, აშშ-ის საელჩოს კონკრეტული თანამშრომლები ალასანია-სააკაშვილის დეზინფორმაციულ, დესტრუქციულ „ლობისტურ“ კამპანიაში პირდაპირ იყვნენ ჩართულნი. დამატებითი ანაზღაურებით თუ ცენტრიდან მიღებული დავალების თანახმად, კუთვნილი ჯამაგირის ფარგლებში, ამაზე ვერაფერს მოგახსენებთ. რეზიდენტურას შიგნიდან თუ ააფეთქებდა თვით ამერიკული პედანტური დამოკიდებულება საკუთარ, თუნდაც რუსულ კანონებთან მიმართებით, ეს კი უნდა მცოდნოდა. ლეგენდარული ალ კაპონე შეკვეთილი მკვლელობების სერიამ, რეკეტმა და უამრავმა სხვა კრიმინალურმა ქმედებამ კი არ მიიყვანა ციხის საკნამდე, არამედ სადეკლარაციო რეესტრში წარდგენილმა არაჯეროვნად შევსებულმა დოკუმენტმა.

მესმის, ამერიკული იურიდიული კომპანია „აკერმანის“ ფული ათვისებულია, საქმე შესრულებულია. სააკაშვილის გამო იმ პრეცედენტს ვერ დაუშვებდნენ, რომ არაჯეროვნად შეევსოთ ამ რუსული კანონით გათვალისწინებული ვალდებულება, თუნდაც ეს ამერიკის ხელისუფლებისთვის წამგებიან ნარატივს მოიცავდეს. ასე გაება ამერიკული რუსული კანონის ხაფანგში რიგითი ამერიკელი დიპლომატი რუსული სახელით Иван. რაც დაგმართა, ივანაო, ყველა შენმა იმანაო - ანუ, რუსულმა კანონმაო. ისე, შენ მაინც წაიკითხე ეს ოხრად დაბეჭდილი ანგარიში და მთლიანად არა (!), ალაგ-ალაგ ქალბატონ კელისაც წაუკითხე, ძირითადი აზრი მოახსენე. Good luck!“ - წერს დავით ქართველიშვილი.