„დიდი შვიდეულის“ (G7) ელჩებმა დაასახელეს ის მოსალოდნელი ნაბიჯები და რეფორმები, რომელიც უკრაინას ომის შემდგომი აღდგენისა და დასავლური ინვესტიციების მოსაზიდებლად სჭირდება.

ელჩები უკრაინის პრემიერ-მინისტრს, დენის შმიგალს შეხვდნენ და ისაუბრეს უკრაინის აღდგენის კონფერენციის შემდეგ მომდევნო ნაბიჯებზე.

„უკრაინის აღდგენასა და რეკონსტრუქციაში კერძო სექტორის ჩართვისთვის მნიშვნელოვანია გამჭვირვალობა და ანგარიშვალდებულება“, - აღნიშნეს „დიდი შვიდეულის“ ელჩებმა.

მათ აღნიშნეს, რომ ამისთვის უკრაინისგან ანტიკორუფციულ სფეროში რიგ ნაბიჯებს მოელიან, კერძოდ: კორუფციის პრევენციის ეროვნული სააგენტოს ახალი ხელმძღვანელის დროულად დანიშვნა, პოლიტიკური პარტიების ქონებრივი დეკლარაციისა და ფინანსური ანგარიშგების სისტემის აღდგენა, ანტიკორუფციული ინსტიტუტების გაძლიერება.