ვინსენტ ვან გოგის მოპარული ტილო „მღვდლის ბაღი ნიუენენში გაზაფხულზე (1884), ნიდერლანდებში იპოვეს. ამის შესახებ BBC წერს.

გამოცემის ინფორმაციით, ნამუშევარი 2020 წელს, ამსტერდამის მახლობლად, ქალაქ ლარენის სინგერის მუზეუმიდან მოიპარეს. ტილო არტ-დეტექტივმა არტურ ბრანდმა აღმოაჩინა, რომელიც ადგილობრივ პოლიციასთან ერთად მუშაობდა. ბრანდის თქმით, ნამუშევარი მას სახლში კაცმა მიუტანა, რომელმაც საკუთარი ვინაობის გასაჯაროება არ ისურვა.

ვან გოგის ტილო 1962-2020 წლებში გრონინგენის მუზეუმის კოლექციის ნაწილი იყო, შემდეგ კი ის სინგერის მუზეუმს მიაქირავეს, საიდანაც ის ფრანგმა კაცმა მოიპარა. 2021 წელს მას 8-წლიანი პატიმრობა მიუსაჯეს. თუმცა ამ დროისთვის ტილოს, რომლის ღირებულებაც 3-6 მილიონ ევროს შეადგენს უკვე სხვა პირები ინახავდნენ. ბრანდი განმარტავს, რომ დროთა განმავლობაში მათთვის ნამუშევრის შენახვა „თავის ტკივილი“ გახდა, ამიტომაც, ერთ-ერთ წვეულებაზე არტ-დეტექტივთან ერთი კაცი მივიდა და კონფიდენციალურობის სრული დაცვის პირობით, ნახატის დაბრუნება შესთავაზა.