"დოლიძის ქუჩაზე მომხდარ დანაშაულში ბრალდებული პოლიციელი 2018 წელს იმდროინდელი შინაგან საქმეთა მინისტრის გადაწყვეტილებით დაითხოვეს, თუმცა იმავე წელს, მისივე მინისტრობის დროს სამსახურში ხელახლა მიიღეს," - ამის შესახებ შსს სტრატეგიული კომუნიკაციების დეპარტამენტის მიერ გავრცელებულ; ინფორმაციაშია ნათქვამი.

„გვსურს გამოვეხმაუროთ, მედიასაშუალებისა და ერთ-ერთი პოლიტიკური პარტიის წარმომადგენლების მიერ გავრცელებულ ინფორმაციას, თითქოს 18 სექტემბერს, თბილისში, ვიქტორ დოლიძის ქუჩაზე მომხდარ დანაშაულში ბრალდებული პოლიციელი უწყებიდან 2018 წელს იქნა დათხოვნილი და იგი უწყებაში შინაგან საქმეთა მინისტრმა ვახტანგ გომელაურმა აღადგინა.

საზოგადოების ინფორმირების მიზნით, გვსურს, განვმარტოთ, რომ 2018 წლის ივლისის თვეში, აღნიშნული პირი, იმდროინდელი შინაგან საქმეთა მინისტრის გადაწყვეტილებით დათხოვნილ იქნა სამინისტროს რიგებიდან, თუმცა იმავე წლის ნოემბრის თვეში, მისივე მინისტრობის დროს, მოხდა გ.ქ.-ს სამსახურში ხელახალი მიღება.

ვგმობთ მომხდარ მძიმე ფაქტს. შინაგან საქმეთა სამინისტრო თანამშრომლობს სპეციალურ საგამოძიებო სამსახურთან, რომელიც მომხდარ შემთხვევაზე გამოძიებას აწარმოებს“, - აღნიშნულია გავრცელებულ ინფორმაციაში.