"ძალიან რთულია არგუმენტებით აბსურდზე ილაპარაკო, - ამის შესახებ „ქართული ოცნების“ აღმასრულებელმა მდივანმა, ფრაქცია „ქართული ოცნების“ თავმჯდომარე მამუკა მდინარაძემ გადაცემაში „იმედი Live“ საკონსტიტუციო სასამართლოში პრეზიდენტის იმპიჩმენტის შესახებ მიმდინარე სხდომასთან დასმული კითხვის საპასუხოდ განაცხადა.

„ეს 2 დღე რომ შევკრათ, საპარლამენტო მოწყობისა და მმართველობის ქვეყნებისთვის დამახასიათებელია სიმბოლური ლიდერის - მეფის, მონარქის, პრეზიდენტის და ა.შ. კომპეტენციაცაა და სტატუსს შორის შეუსაბამობა და აცდენა. ეს რას ნიშნავს? ანუ, სტატუსი გაცილებით მაღალი და მისი უფლებამოსილება აბსოლუტურად შეუსაბამოა ამ მაღალ სტატუსთან. ზუსტად იგივეა საქართველოს კონსტიტუციაშიც. როგორც კი გადაწყდა, რომ საქართველო არის საპარლამენტო მოწყობის ქვეყანა, იმ წუთასვე ეს გაიმიჯნა ერთმანეთისგან. არის ისეთი სიღრმეები, რომელიც შეიძლება ბევრმა ადამიანმა ვერ გაიგოს, მაგრამ თუ დავუშვებთ იმას, რომ ისე წავიკითხავთ პრეზიდენტის სტატუსის შესახებ მუხლს, როგორც მისი წარმომადგენლები ცდილობენ წააკითხონ საზოგადოებას, სასამართლოს, მაშინ არ გვქონია საპარლამენტო მოწყობის ქვეყანა“, - აღნიშნა მამუკა მდინარაძემ.