იუსტიციის მინისტრის, რატი ბრეგაძის განცხადებით, საქართველოს პრეზიდენტმა სალომე ზურაბიშვილმა დაარღვია კონსტიტუცია და რა თქმა უნდა, ეს ძალიან სამწუხარო ფაქტია.

„რაც შეეხება იმპიჩმენტის პროცესს, მოგეხსენებათ, საკონსტიტუციო სასამართლომ მიიღო გადაწყვეტილება, რომ პრეზიდენტმა დაარღვია საქართველოს კონსტიტუცია. პირადად ჩემთვის, როგორც იუსტიციის მინისტრისთვის, ძალიან სამწუხაროა, რომ უკვე არის დადგენილი ფაქტი, რომ საქართველოს პრეზიდენტმა დაარღვია კონსტიტუცია“, - აღნიშნა ბრეგაძემ.

კითხვაზე, „ირაკლი კობახიძემ არ გამორიცხა, საქმე პროკურატურაში წავიდეს“, - რატი ბრეგაძემ განაცხადა, რომ აღნიშნულთან დაკავშირებით პროკურატურის მისამართით უნდა დაისვას შეკითხვა.

„პროკურატურის ნაწილზე მე როგორ გიპასუხოთ, ამაზე უნდა ჰკითხოთ პროკურატურას. ზოგადად, თუკი ვინმე ჩაიდენს სისხლის სამართლის დანაშაულს, რა თქმა უნდა, შესაძლებელია, რომ დაიწყოს გამოძიება“, - განაცხადა რატი ბრეგაძემ.

ამასთან, შეკითხვის პასუხად რატი ბრეგაძემ აღნიშნა, რომ ევროპელ ლიდერებთან შეხვედრის გამო არავის დაუწყია იმპიჩმენტის პროცედურა.

„პროცედურა დაიწყო იმის გამო, რომ იყო საფუძვლიანი ვარაუდი, პრეზიდენტმა დაარღვია კონსტიტუცია. ეს ისედაც ცხადი იყო, თუმცა ამის შესახებ მტკიცებით ფორმაში არავინ საუბრობდა, ვიდრე საკონსტიტუციო სასამართლომ არ მიიღო შესაბამისი გადაწყვეტილება. დღეს უკვე დადასტურებული ფაქტია, რომ საქართველოს პრეზიდენტმა დაარღვია საქართველოს კონსტიტუცია და ეს არის სამწუხარო ფაქტი. თქვენ თუ მოუსმენთ საკონსტიტუციო სასამართლოში პროცესს, საუბარი იყო იმაზე, რომ მან არ აიღო მთავრობისგან შესაბამისი ნებართვა, ეს არის კონსტიტუციის დარღვევა და სწორედ ამიტომ მიმდინარეობდა მთელი ეს პროცესი. როდესაც მიმდინარეობს სამართლებრივი პროცედურა კონსტიტუციის და ყველა სხვა კანონის სრული დაცვით, ეს არავითარ შემთხვევაში არ არის დამაზიანებელი, პირიქით, სამართლებრივ სახელმწიფოში ეს არის ჩვეულებრივი სიტუაცია. ევროკავშირი არის იმ სახელმწიფოთა გაერთიანება, რომლებიც სამართლებრივი სახელმწიფოები არიან“, – განაცხადა რატი ბრეგაძემ.

საქართველოს პარლამენტის დღევანდელ პლენარულ სხდომაზე პრეზიდენტ სალომე ზურაბიშვილის იმპიჩმენტის საკითხს უყარეს კენჭი. პრეზიდენტის იმპიჩმენტის საკითხი პარლამენტში ჩავარდა, რადგან კენჭისყრაზე პრეზიდენტის გადაყენებისთვის საჭირო ხმები ვერ მოგროვდა. პრეზიდენტის იმპიჩმენტთან დაკავშირებით პროცესმა საკანონმდებლო ორგანოში მას შემდეგ გადაინაცვლა, რაც საკონსტიტუციო სასამართლომ გამოაცხადა დასკვნა, რომ პრეზიდენტმა საქართველოს კონსტიტუცია დაარღვია.