ის მსახიობი იყო და არა მომღერალი, მაგრამ მის მსგავსად ვერავინ იმღერებს:

„მე საქართველოს სიყვარულის წყარო მწყურია"...

თენგიზ არჩვაძე უნდა იყო, ასე რომ იმღერო.

ვერც არსაკიძის როლი გიშველის, ვერც მუშნი ზარანდიასი, ილიასიც კი, თუ არ ხარ

პიროვნება,

მოქალაქე,

მამულიშვილი...

***

თუ ნებისმიერი პიროვნების დახასიათება ერთი სიტყვითაც შესაძლებელია, თენგიზ არჩვაძე ამ სიტყვით უნდა შეფასდეს: ღირსეული.

ასეთი იყო ის სცენაზეც და ცხოვრებაშიც.

ილიას, აკაკის, ვაჟას, გალაკტიონის მაღმერთებელი, ბილწთ არასოდეს შეკვრია ზავით და ურთულეს ეპოქაში, ისე იარა, ტალახის ერთი შხეფიც არ მოსცხებია.

***

საქართველო იყო მისი მთავარი სიყვარული.

საქართველოსაც გულით უყვარდა.

სულ ეყვარება...