ტორონტოს საერთაშორისო აეროპორტში 31 დეკემბრამდე საქართველოს სხვადასხვა კუთხის ამსახველი ფოტოები განთავსდა.

საქართველოს ტურიზმის ეროვნული ადმინისტრაციისა  და კანადაში საქართველოს საელჩოს თანამშრომლობით ტორონტოს საერთაშორისო აეროპორტში საქართველოს ტურისტულ პოტენციალს ეცნობიან.

პროექტის ფარგლებში, ტორონტოს საერთაშორისო აეროპორტში, კანადელი ფოტოგრაფების, მამა-შვილის, რენდი და სპენსერ ვანდერსტარენების მიერ გადაღებული ფოტო-სლაიდებია წარმოდგენილი.

კანადელმა ფოტოგრაფებმა საქართველოში გასულ წელს ტურიზმის ეროვნული ადმინისტრაციის პრესტურის ფარგლებში იმოგზაურეს და სხვადასხვა ტურისტული ადგილები გადაიღეს. გამორჩეულ ფოტო ნამუშევრებს, უშგულის, გუდაურის, თბილისისა და სხვა ტურისტულად საინტერესო ადგილების ამსახველ ფოტოებს,  ტორონტოს საერთაშორისო აეროპორტის მგზავრები 2 თვის განმავლობაში გაეცნობიან.

ტორონტოს საერთაშორისო აეროპორტი მსოფლიოში ერთ-ერთი ყველაზე დატვირთულია, 2022 წელს აეროპორტმა 36 მილიონი მგზავრი მიიღო.

საქართველოში გადაღებული სურათების სრულად დათვალიერება შესაძლებელია ფოტოგრაფების ვებ-გვერდზე: https://www.takeyourseatonline.com/georgia