"იუსტიციის მინისტრის მიერ წარმოდგენილი ანგარიში ყველა შესაბამის საკითხთან მიმართებაში ორიენტირებული იყო მომავალზე, ორიენტირებული იყო იმაზე, თუ რა ვითარდება სერვისების მიმართულებით ჩვენი მოქალაქეებისთვის და რა იცვლება უკეთესობისკენ მათი ინტერესების შესაბამისად," - განაცხადა პლენარულ სხდომაზე საპარლამენტო უმრავლესობის წევრმა, ანრი ოხანაშვილმა იუსტიციის მინისტრის, რატი ბრეგაძის „მინისტრის საათის“ ფორმატში მოსმენის დროს.

ანრი ოხანაშვილმა ყურადღება გაამახვილა იუსტიციის სამინისტროს მიერ გატარებულ რეფორმებზე.

„ბატონმა მინისტრმა ისაუბრა სერვისების ხელმისაწვდომობაზე, რომელიც ჩვენს მოქალაქეებს უზოგავს დროს და ეფექტიანი ადმინისტრირების საშუალებას აძლევს, ისაუბრა მიწის სისტემურ რეგისტრაციაზე, რომელიც ძალიან მნიშვნელოვანია სახელმწიფოსთვის და ჩვენი მოქალაქეებისთვის, ისაუბრა არა ყველას დასჯაზე და ნულოვან ტოლერანტობაზე, არამედ მსჯავრდებულთა რესოციალიზაცია - რეაბილიტაციაზე, მედიაციაზე და იმ სერვისებზე, რომელიც განვითარდა და კიდევ ვითარდება იუსტიციის სამინისტროში.

ასევე, ძალიან მნიშვნელოვანია, რომ იუსტიციის სამინისტროს ამჟამინდელი ხელმძღვანელობით მომზადებულია „პენიტენციური კოდექსი“, რომელიც ჩვენ უკვე ორი მოსმენით განვიხილეთ და ის მნიშვნელოვან უფლებრივ სტანდარტებს ითვალისწინებს ჩვენი მსჯავრდებულებისთვის“, - აღნიშნა იურიდიულ საკითხთა კომიტეტის თავმჯდომარემ.