თბილისში, ასათიანის N10-ის მიმდებარედ ორმოცდაათ მრავალწლიან ნარგავს სხვლა-ფორმირება ჩაუტარდება. ტერიტორია კომპანია „ბი-დი ფროფერთის" ეკუთვნის, ტერიტორიაზე  კომპლექს „თბილისი გარდენის" მშენებლობა მიმდინარეობს.

სხვლა-ფორმირება და მოვლითი ღონისძიებები უტარდება როგორც წიწვოვან ნარგავებს, ისე ვერხვებსაც, რომელთა მდგომარეობა სპეციალისტების შეფასებით, არასახარბიელოა. ხმელი ტოტებისგან გაიწმინდება ასათიანის ქუჩის გასწვრივ არსებული ხეებიც, რადგან ისინი საფრთხეს უქმნის ფეხით მოსიარულეებს.

სხვლა-ფორმირების სამუშაოებს ახორციელებს „პროფესიონალთა გაერთიანება ხის მოვლისათვის საქართველოში",  მისი ხელმძღვანელის, დავით სამხარაძის უშუალო მეთვალყურეობით.

ასათიანის N10-ში ნარგავების მოვლითი ღონისძიებების ჩატარების თხოვნით, ინვესტორმა მერიას რამდენიმე კვირის წინ მიმართა. შესაბამისი ნებართვა კი თბილისის გამწვანების სამსახურმა გასცა.