გიორგი მიქაუტაძემ აუცილებლად უნდა დატოვოს „აიაქსი“ – ამის საჭიროებას ბოლო დროს ქართველი ლეგიონერის თავს ნიდერლანდურ გრანდში მომხდარი ამბები ადასტურებს.

ერედივიზიონის მე-15 ტურის შეხვედრაში ამტერდამელებმა „იოჰან კრუიფი არენაზე“ როტერდამის „სპარტას“ უმასპინძლეს და 2:1 დაამარცხეს. საქართველოს ნაკრების თავდამსხმელი „აიაქსის“ განაცხადში იყო, მაგრამ ამჯერადაც მოედანზე შესვლის და თავის გამოჩენის შანსი არ მიეცა.

„აიაქსმა“ თამაში კარგად დაიწყო და პირველი ტაიმი 2:0 მოიგო. მე-8 წუთზე ანგარიში მიქაუტაძის კონკურენტმა ბრობიმ გახსნა, ხოლო ამსტერდამელების უპირატესობა 42-ე წუთზე ბერგვაინმა პენალტით გაზარდა. როტერდამის „სპარტამ“ 55-ე წუთზე ნეგლის გოლით სხვაობა შეამცირა, მაგრამ თამაში ვეღარ გადაარჩინა.

„აიაქსმა“ ბოლო ექვსი მატჩიდან ხუთი მოიგო, ერთი ფრედ დაასრულა – ამ წარმატებული სერიით უკვე 24 ქულა დააგროვა და ერედივიზიონში მე-5 ადგილზე დაწინაურდა, რაც კონფერენსლიგაზე თამაშის უფლებას იძლევა.