„საქართველოს მთავრობის ერთ-ერთი მნიშვნელოვანი პრიორიტეტი ციფრული ეკონომიკის და საინფორმაციო საზოგადოების და  ამისთვის საჭირო სატელეკომუნიკაციო ინფრასტრუქტურის განვითარების ხელშეწყობაა. ბოლო წლებში საინფორმაციო ტექნოლოგიების სექტორში განხორციელებულმა რეფორმებმა და პროგრამებმა გადამწყვეტი როლი ითამაშეს ჩვენი ქვეყნის ციფრული სფეროს განვითარებაში. ჩვენ აქტიურად ვმუშაობთ საქართველოს გავლით, ევროპისა და აზიის ქვეყნების დამაკავშირებელი ციფრული ჰაბის ფორმირების მიმართულებით, რაც ითვალისწინებს როგორც ფართოზოლოვანი სატელეკომუნიკაციო ინტერნეტ ინფრასტრუქტურის განვითარებას შავი ზღვის გავლით, ასევე საქართველოში საერთაშორისო სტანდარტების შესაბამისი რეგიონალური „დატა ცენტების“ ფორმირებას,“ - განაცხადა ეკონომიკისა და მდგრადი განვითარების მინისტრის მოადგილე გურამ გურამიშვილმა საქართველოს მე-9 ინტერნეტ მმართველობის ფორუმი GeoIGF 2023 - ის გახსნაზე გამოსვლისას.

მინისტრის მოადგილემ ყურადღება გაამახვილა სამინისტროს ეგიდით მიმდინარე ისეთ აქტივობებზე, როგორიცაა სახელმწიფო ინტერნეტიზაციის პროექტი; უნივერსალური მომსახურების რეგულაციების პროექტები; ციფრული ეკონომიკის განვითარების სტრატეგია; ელექტრონული კომერცია და სხვ. „ჩვენ დიდი ძალისხმევა გვაქვს მიმართული ევროკავშირის ციფრულ ერთიან ბაზართან საქართველოს ინტეგრაციის მიმართულებით. ევროპელი ექსპერტების ჩართულობით, დაიწყო მუშაობა საქართველოს ევროკავშირის როუმინგულ რეგულაციებთან საქართველოს კანონმდებლობის ჰარმონიზების საკითხებზე. ეს კომპლექსური სამუშაო და პროცესია, რომელიც დარწმუნებული ვარ, წარმატებით ჩაივლის და მომავალში ჩვენი მოსახლეობა, ევროკავშირში ვიზიტისას ბევრად ხელმისაწვდომი ტარიფებით ისარგებლებს,“ - განაცხადა გურამ გურამიშვილმა. 

ინტერნეტ მმართველობის ფორუმი GeoIGF ყოველწლიური კონფერენციაა, რომელიც 2015 წელს დაარსდა. საქართველოს ინტერნეტ-მმართველობის ფორუმი აერთიანებს საქართველოს ინტერნეტ-მართველობის საკითხებით დაინტერესებული პირებს. წლევანდელი ფორუმის ორგანიზატორია მცირე და საშუალო სატელეკომუნიკაციო ოპერატორების ასოციაცია (TOA), საქართველოს ეკონომიკისა და მდგრადი განვითარების სამინისტრო და კომუნიკაციების კომისია, ხოლო მხარდამჭერები არიან  USAID,  ევროპის საბჭო, ინტერნეტ საზოგადოება (ISOC),  მინიჭებული სახელებისა და ნომრების ინტერნეტ-კორპორაცია (ICANN) და RIPE ქსელის საკოორდინაციო კომიტეტი (RIPE NCC), ასევე ლოკალური მხარდამჭერია ასოციაცია GRENA და საქართველოს ელექტრონული ვაჭრობის პალატა.