ტერორისტული ორგანიზაცია „ჰამასის“ მიერ კონტროლირებადი ღაზის ჯანდაცვის სამინისტროს მონაცემებით, ღაზაში დაღუპულთა რიცხვმა 22 ათასს გადააჭარბა. ინფორმაციას ამის შესახებ ტელეკომპანია CNN-ი ავრცელებს.

დამოუკიდებლად გადაუმოწმებელი მონაცემების თანახმად, 7 ოქტომბერს ისრაელზე „ჰამასის“ მიერ განხორციელებული თავდასხმის შემდეგ, ღაზაში 22 185 ადამიანი დაიღუპა.

25 ოქტომბერს, აშშ-ის პრეზიდენტმა, ჯო ბაიდენმა განაცხადა, რომ ის არ ენდობა „ჰამასის“ მიერ კონტროლირებადი ღაზის ჯანდაცვის სამინისტროს მიერ მიწოდებულ ინფორმაციას მშვიდობიან მოსახლეობას შორის მსხვერპლის რაოდენობის შესახებ.

7 ნოემბერს, აშშ-ის სახელმწიფო დეპარტამენტის სპიკერის მოადგილემ, ვედანტ პატელმა განაცხადა, რომ „ჰამასის“ მიერ კონტროლირებადი ღაზის ჯანდაცვის სამინისტროს დაღუპულთა რიცხვის გაბერვის გამოცდილება აქვს.