თბილისის მერის კახა კალაძის შეფასებით, პარტია „საქართველოსთვის“ დამფუძნებელი, ყოფილი პრემიერ-მინისტრი გიორგი გახარია აბსოლუტურად სხვა ლიგაში თამაშობს და ბევრი აქვს სამუშაო. ამის შესახებ კალაძემ გახარიას მიერ „ქართული ოცნება - დემოკრატიული საქართველოს“ საპატიო თავმჯდომარის, ბიძინა ივანიშვილის დებატებში გამოწვევის ფაქტის კომენტირებისას განაცხადა.

„გიორგი გახარია აბსოლუტურად სხვა ლიგაში თამაშობს. საზოგადოება ყველაფერს კარგად ხედავს. მას ძალიან ბევრი აქვს ჯერ კიდევ სამუშაო“, - განაცხადა კახა კალაძემ.

ამასთან, კითხვაზე - უღალატა თუ არა გახარიამ გუნდს, თბილისის მერი დადებითად პასუხობს.

„რა თქმა უნდა, ეს ღალატია, როდესაც ისეთ რთულ მდგომარეობაში, რა მდგომარეობაც იყო, მსგავსი გადაწყვეტილება მიიღო. ვფიქრობ, საზოგადოებამ შეაფასა ეს ყველაფერი და არჩევნებზე ყველას გასცა შესაბამისი პასუხი. ასე იქნება მომავალშიც. საქართველოში არ უყვართ მოღალატეები“, - აღნიშნა კახა კალაძემ.