„იქნებ თქვენი უფლება-მოვალეობები კარგად გაგეთავისებინათ და პოლიტიკური რადიკალიზაციის ხელშეწყობისგან თავი შეგეკავებინათ, არა?!“, - ასე ეხმიანება „ხალხის ძალის“ წევრი, ზურაბ ქადაგიძე საქართველოში დანიის ელჩს, ანე ტოფტ სორენსენს, რომელმაც ბიძინა ივანიშვილი ოლიგარქად მოიხსენია.

ქადაგიძემ ელჩს მოუწოდა, გაუფრთხილდეს რეპუტაციას და ნუ გახდება ქართულ-ევროპული გადატვირთული ურთიერთობების დამაზიანებელი.

„ქალბატონო ელჩო, იქნებ თქვენი უფლება-მოვალეობები კარგად გაგეთავისებინათ და პოლიტიკური რადიკალიზაციის ხელშეწყობისგან თავი შეგეკავებინათ, არა?! თუ, ახალი დავალებაა წამოსული გლობალური პოლიტკონიუქტურის შემოქმედებისაგან და სხვა ვერაფერი მოიფიქრეთ, რომ ხელოვნურ სუნთქვაზე მიერთებული რადიკალური ოპოზიცია გამოაფხიზლოთ? შეხსენებისთვის, ქართულმა საზოგადოებამ ჰარცელი და კელი დეგნანი მოინელა, თავიანთი უპასუხისმგებლო, პროვოკაციული განზრახვებითურთ და დამერწმუნეთ, თქვენი მონელება არაფერი დიდი ბედენა იქნება! ასე, რომ გაუფრთხილდით რეპუტაციას და თქვენ საქმეს მიხედეთ. ნუ გახდებით ქართულ-ევროპული გადატვირთული ურთიერთობების დამაზიანებელი!“, - წერს ზურაბ ქადაგიძე facebook-ზე.