"არ უნდა დაგვავიწყდეს, რომ ამ ადამიანმა, შეიძლება ასე ვთქვათ - ყველაზე მძიმე ჟამს ამ ხელისუფლებისთვის და ქვეყნისთვის, მიატოვა ხელისუფლება," - ამის შესახებ ფრაქცია „ქართული ოცნების“ თავმჯდომარის მოადგილე გია ცაგარეიშვილმა ჟურნალისტებთან გიორგი გახარიაზე საუბრისას განაცხადა.

„საღამოს ქვეყანამ დაიძინა მოქმედი პრემიერ-მინისტრით და გაიღვიძა უკვე პრემიერ-მინისტრის გარეშე - ეს ადამიანი უბრალოდ გაიპარა. მან ძალიან კარგად იცოდა, რომ სწორედ რევანშიზმის წყურვილით ანთებულ ნაცმოძრაობას უგდებდა კლანჭებში ხელისუფლებას და მაინც გადადგა ეს ნაბიჯი. ხვდებით, რა დონის ღალატთან გვაქვს შეხება? ამის შემდეგ ის გამოდის და ამბობს, რომ თურმე ბიძინა ივანიშვილთან უნდა დებატი. ჩემი აზრით, ზღვარდაუდებელი პატივმოყვარეობის ბრალია ეს ყველაფერი“, - აღნიშნა ცაგარეიშვილმა.

პარტია „საქართველოსთვის“ ლიდერმა, ყოფილმა პრემიერ-მინისტრმა გიორგი გახარიამ „ქართული ოცნების“ საპატიო თავმჯდომარე ბიძინა ივანიშვილი დებატებში გამოიწვია.