„მინდა ვისარგებლო შემთხვევებით და ძალიან დიდი მადლობა გადავუხადო ირაკლი ღარიბაშვილს, იმისთვის რაც მან წლების განმავლობაში ამ ქვეყნისთვის გააკეთა. იცით, რომ მისი პრემიერობის პერიოდში ძალიან დიდ წარმატებას მიაღწია ჩვენმა ქვეყანამ“, - ამის შესახებ „ქართული ოცნების“ აღმასრულებელმა მდივანმა მამუკა მდინარაძემ განაცხადა.

ფრაქცია „ქართული ოცნების“ თავმჯდომარემ ღარიბაშვილის წარმატებებს შორის კანდიდატის სტატუსის მიღება და ეკონომიკური პროგრესი დაასახელა. მან ასევე განმარტა როდის მიიღო მმართველმა გუნდმა ეს გადაწყვეტილება.

„24 იანვარს გაიმართა პარტიის პოლიტსაბჭოს სხდომა, რომელზეც ვისაუბრეთ იმ საკითხებზე, რომლებიც დღეს გახდა საზოგადოებისთვის ცნობილი. მათ შორის იყო შეთავაზება პოლიტსაბჭოს მხრიდან, რომ საარჩევნო მარათონის აქტიურ ფაზაში გადასვლამდე ყოფილიყო ბატონი ირაკლი ღარიბაშვილი და შემდეგ მომხდარიყო ეს ცვლილება გარკვეული როტაციის პრინციპით. მაგრამ მან თავად მიიღო ასეთი გადაწყვეტილება, რომ ახალ პრემიერს უნდა მიეცეს საშუალება მთელი ეს პერიოდი გამოიყენოს ახალი გუნდის, ხედვების, მიდგომების ჩამოსაყალიბებლად“, - განმარტა მდინარაძემ.

მისივე თქმით, ცვლილებები 1 თებერვალს, „ქართული ოცნების“ ყრილობაზე დამტკიცდება განმარტა რა პროცედურების გავლა იქნება ამისთვის საჭირო.

ირაკლი ღარიბაშვილმა საქართველოს პრემიერ-მინისტრის თანამდებობა დატოვა და საქმიანობას „ქართული ოცნების“ თავმჯდომარის პოსტზე განაგრძობს.